انا بحبه اوى اوى بس هو مسافر بيشتغل فى بلد عربى من كتر قلقى عليه وخوفى يمكن اتصل مرة واحدة فى اليوم بس لمجرد انى ارن عليه وميتصلش بيا بقلق جدا جدا عليه بتصل مرتين كل مثلا نصف ساعة واكتشف انه مثلا كان بياكل ومش عايز يرد عليا او اى حاجة هايفة بتضايق جدا لانى حاسه انه مابيحبنيش وبقولى انتى زنانة افرضى ماليش مزاج ارد اية بالعافية ده حاجة قرف بستحمل واعدى بس انا تعبانة جدا ومش عارفة اتعامل معاها ازاى عشان احافظ علية واحس انه مقتنع بيا انا فعلا حيرانة جدا بين انى ماقلقش ومتصلش وبين حبى ليه الشديد جدا الى مخلينى حتى مابقتش عارفة افكر نفسى الاقى طريقة اعرف اتعامل معاها بيها من غير ماخسروه
مشاكل الخطوبة
خطيبى بيقول عليا زنانة
اضيف بتاريخ: Wednesday, December 8th, 2010 في 00:49
كلمات مشاكل وحلول: الخطوبة, مسافر, مشاكل الخطوبة
بصى يااختى الكريمه واللهى انا خاطب وحده يمكن زنانه دى شويه عليها بس هى فعلا بتحبنى وانا بحبهاجدا بس لازم تبطلى زن خلى بالك الراجل بيكره الوحده الزنانه قدرى ظرفو يمكن يكون مشغول او مضايق الغربه يااختى صعبه وهو متغرب عشان خطرك وفى حاجه تانيه كمان خلى بالك منها حتى لما تتكلمى لازم يكون كلامك فحدود ربنا يكرمك ويسهل امورك وترجعلى بالسلامه وانت وحشتنى كتير ودى احسن حاجه الواحد يحب يسمعها دى نصيحه من اخوكى بلاش بقى الكلام اللى يضايق انت مش مهتم بيا انت مش بتحبنى زى الاول انت اتغيرت فعلا اناالكلام ده بينرفزنى جدا خلى بالك ودى نصيحه منى ليكى خليكى ديما حنينه معاه اهتمى بكل امور حياتو لمايكون متضايق اسمعيه هونى عليه بس يارب تسمعى الكلام متعميلش زى خطبيتى اقولها الكلام ده وتعمل بى شويه وبعد كده ترجع تزن وتقرفنى بس انااتعودت عليهاخلاص انااتحملت بس صوبعك مش زى بعض يمكن هو يكون عصبى او مش بيستحمل خليكى خفيفة على قلبو متوجعيش قلبو هههههههههه وربنايوفقكم ويجمعكم على خير ان شاء الله ومتنسيش ياستى تعزمينا فالفرح
اشكرك جا جدا على ردك ياسيد بس احبك اعرفك حاجة مهمة خطيبى لما يكون متضايق لايمكن يحكيلى ولو قولتلوه رنلى لما تفضى قالى يعنى انتى مش هتتصلى بيا الا لما ارن عليكى لاء طبعا وبقت مشكلة انا تعبانة وبجد لما بشوف المخطوبين بيتعاملوه ازاى بيصعب عليا نفسى نفسى اسيبوه مش عارفة اعمل ايه تعبت جدا جدا
انا لا اقول ليكى زى مابقيت الاخوه قال بس هقولك سيبى لم مايرديش لا تتصلى مع اصح اتقلى شويه وسيبيه لم يحس انك طنشيتى هو ساعته هيستغرب هيقول هى ماله دى وهيتصل بيكى هيسالك انتى ليه بقيتى كده قوليله عشان مابقيش زنانه وعجابك وافضلى على كده شويه هو هيتعتل فى وقته
بصراحة فعلا بدون زعل يا ست البنات زنانة وانا خطينتي زيك بالضبط بحبها ومعزها ومقدراش اعيش بدونها بس هي زيك ترن وتحب الكلام طب الكلام بيخلص انتو عايزين تتكلم في ايه تاني معرفش احنا متغربين علشانكم ربنا يهديكم
مش تزعلي مني بس فعى نفسي مشكلتي بس انا بصراحة غير خطيبك مش برد عليها خلاص ولما كلامها باليل بيخلص وتحب برضو تتكلم بنام وهي معايا ربنا يسعدك ويكرمك انتي وخطيبك ويكون بيحبك اكثر مما تتخيلي ان شاء الله بالتوفيق يا ست البنات
اختي العزيزه , انا مريت بنفس الظروف دي بالظبط . انا برده مسافر في السعوديه وخطيبتي بترن عليا كتير وعاوزاني اكلمها علي طول هي بتحبني وانا بعشقها . لكن اختي احنا كتير بنكون مشغولين او فيه اي ظروف عندنا ولازم تعذرونا احنا بنشتغل ومتغربين علشانكوا لازم تتأكدي من كدا
خطيبك بيحبك وعلشان كدا لازم تراعي غربته وربنا يجمعكم علي خير قولي امين
كبرى دماغك واتقلى شوية علشان يحس بيكى
يمكن يقدر النعمه الى مش حاسس بيها
بصى يا اختى انا وخطيبتى كنا عكسك انتى وخطيبك
انا كنت احيانآاتصل بخطيبتى وما تردش او ترد وتتعصب عليا وما تكلمنيش باسلوب كويس لانى كنت بكلمها فى اوقات مش مناسبه بتكون مشغوله فى مصالح البيت او بتزاكر او معاها حد او اى حاجه
الحل بقى نك تعملى مع خطيبك زى ما انا كنت مع خطيبتى
انا اتفقت معاها انها تختار الوقت المناسب اللى تكون فاضيه فيه وترن عليا وانا اتصل بيها ونكلم بعض على قد ما نقدر وكان كلامنا فى الغالب بيكون بالليل بعد ما تكون بقت فاضيه او اثناء ماهى ماشيه فى الطريق رايحه او جايه من مشوار وبكده كنا بنراعى مشاعرنا وبنوفر وقت وبنتكلم باسلوب كويس وكده
فانتى قوليلوا انك تتصل بيا فى الوقت المناسب ليك
وعشان ما يحصلش حاجه تضايقوا قوليلوا انا لو ظروفى تسمح هارد عليك ولو ظروفى ما سمحتش مش هينفع ارد عليك الا فى وقت تانى ولو ما عرفتيش تردى ممكن لو استطعتى تبعتيلوا رساله تتآسفيله انك ما ردتيش عليه وتعرفيه السبب
وكمان تقوليله لو هو متفق معاكى على يوم ووقت معين يتصل بيكى فيه وما سمحتش الظروف انوا يتصل يبقى يبعتلك رساله يعتذرلك ويطمنك ويعرفك سبب عدم اتصاله
كمان هقولك على حاجه كنا بنعملها انا وخطيبتى اننا كنا بنرن على بعض رنات مش اكتر وهى ما بتاخدش وقت ولا جهد
ودى فايدتها انها بتقربنا من بعض وبطمنا على بعض وتحسسنا اننا فاكرين بعض دايمآ ومش مشغولين بحد تانى وكمان بتصبرنا لحد ما نكلم بعض فى الوقت المناسب
ويبقى احسن لو كل واحد فيكم اختار للتانى رنه للموبايل تكون معبره عن مشاعره ناحية التانى
وساعة ما يرن تشعرى بمتعه وبفرحه وده كانه نص المكالمه اللى انتوا بتتكلموها
ويا سلام بقى لو اتفقتوا تبعتوا لبعض رسايل كل يوم والتانى مثلا تبقى حياتكم روعه
(ملحوظه)
ياريت المكالمه تبقى على حسب الظروف يعنى لو مبسوطين تبقى المكالمه ضحك وهزار ومناقشه واسئله وتعارف وتفاهم وكده يعنى
ولو فيه حد منكم مثلآ متضايق او زعلان من حاجه او متعصب تبقى المكالمه تدور حول معرفة هذه الاشياء فلكل مقام مقال
على فكره دى تجربه حقيقيه وجابت نتيجه كويسه وكانت سببآ فى حب حبيبتى لى واهتمامها بى ولهفتها عليا لان النظام ده من فوايده اننا كنا بنراعى مشاعر بعض وبنبين خوفنا واهتمامنا على بعض
وربنا يوفقكم ويسعدكم يارب ويقدملكم اللى فيه الخير
ومستنى ردك
(سيد العاطفى)
مصر__بنى سويف
انتى كده بتفرضى نفسك عليه لدرجه انو فعلا يكره اليوم الى عرفك فيه الغربه لها ضريبه كبيره جدا انتى دلوقتى خطيبتو فما بال لو اتزوجتى وهو سافر اكيد بردو هتلاحقيه بالتليفون وامك عملت واختك بتقول ومحتاجه كذا بصراحه هو صبور جدا جدا جدا غيرى من طباعك لانو بجد انتى زنانه وممكن تخربى حياتك بنفسك المفروض تسيبيه لحتى يشتاقلك وقتها هو الى هيتصل كفايه المرار الى هو عايش فيه يعنى هيكون مرار غربه ومرار كمان من خطيبتو ده ايه الذل ده ارحميه علشان تكسبيه وشكرا
خفى حبة تزيدى محبة يعنى زى ماهو بيعملك عمليه اتقلى عليه شوية