مش عارف ابتدي منين اولا انا شاب عندي 22 سنه في هندسه خاصه .. اتربيت في السعوديه 18 سنه واتولدت هناك ونزلت مصر ادرس بكلية هندسه حكومي سنتين واتفصلت ودلوقتي في خاصه
مش عارف مشكلتي ايه بالزبط هي كل مشكله بتولد مشكله جديده لحاد ما بقيت باحس بالمعنى الحرفي ان 90% من طاقه تفكيري رايحه في التفكير المشاكل دي بفكر في اسبابها اكتر ما بفكر في علاجها وتقريبا عقلي هو اللي بقى بيخلق المشاكل دي ويكبرها وكل يوم تزيد وتكبر ..
النتيجه اني دلوقتي سلبي جدا جدا ..
اخر مشكله اتكونت هي اني بحاول اعرف انا ليه بقيت كده .. بقى كل شاغل تفكيري انا ليه بقيت كده .. وافكر في تفاصيل التفاصيل وانقض نفسي واحسس نفسي بالذنب والنقص مع العلم اني من 4 سنين بالزبط كنت اخر واحد ممكن يشيل هم اي حاجه .. كنت بمارس هواياتي رسم وباكتب شعر وباعمل موسيقى ع الكمبيوتر وكنت ذكي جداوباعرف استمتع بكل حاجه باعملها حتى الروتين ..
كل ده انا لسه ما حكيتش عن مشكلتي اللي محتاج امسك جذورها عشان حضراتكم تفهموها ..
باختصار الموضوع ابتدى باني حسيت اني شكلي ملفت وحلو .. دي نعمه وميزه لاي شاب وسيدنا يوسف كان بيتميز بالميزة دي المهم حسيت اني دايما عليا الانظار كنت باتعامل بكامل طبيعتي وانا عارف ان عليا الانظار ويمكن كنت بتعامل بطبيعه احسن كمان .. اللي حصل دلوفتي ان دي بقت واحده من مشاكلي .. بقيت حاطط نفسي محل الشخص المتراقب اللي لايمكن يغلط حتى لو عطست لازم اعطس عطسه حلوة .. اقسم بالله عذاب نفسي
بقيت باشرب حشيش بكميات رهيبه حتى قبل ما انزل الكليه لازم اشرب ووانا راجع اشرب بردو وده مش بياثر عليا دراسيا بالعكس بس اجتماعيا انا اصلا شبه مقطوع .. مابعرفش اتكلم وسط شله مابعرفش اتعرف زي زمان ماباعرفش ابتسم وبيبان اني باصطنع الابتسامه حتى بقيت باوهم نفسي ان صوتي لازم يتخن شويه .. دلوقتي بس ابتديت اخد بالي ان صوتي مش مزبوط .. طبعا ده غلط بس انا وصلت بيا المرحله لكده
صحابي القدام اتمسحوا باستيكه وانا ماكنتش مهتم من الاول والزمن لعب دوره ونسيتهم وحاليا مليش صحاب غير واحد وتقريبا منفضله او منفض للخروج عمتن ..
مشكلتي اني (كنت) مثالي في كل حاجه من صغري ومولود في عيله مثاليه .. مشاكلي الداخليه دي استحاله اخلي حد يحسها فبكتمها انا بقالي سنه تقريبا ع الحاله دي ..
ذكاءي قل جدا او تقريبا بقى مشتت .. لو حد كلمني ماعنديش سرعه البديهه اني ارد الرد المناسب اللي يدي انطباع كويس .. ردي بيبقى لمجرد الرد الفوري المزيف او ال standerd
حتى شخصيتي بقت مصطنعه
دي مشاكل اكتئاب مراهقه قريت عنها كتير بس انا مش عارف ايه الحل .. مع العلم ان انا عمال اخلق وحش من المشاكل دي .. الحل دكتور نفسي ولا فيه حاجه ارحم شويه ومتحطنيش في موقف المريض المضطر ؟
انا طولت على حضراتكم وبما اننا كلنا عندنا مشاكل يمكن حد يكون عنده جزء من مشاكلي او انا مشاكلي جزء من مشاكله ..
انا خلقيا مفيش حاجه ممكن تاثر على شخصيتي غير اني بيبي فيس شويه ودي حاجه الناس بتمدحها فيا وانا اتاقلمت عليها .. رفيع بس جسمي رياضي ومقسم الحمدلله .. دراسيا الدنيا خبطت معايا بس استقريت في الاخر على قسم بحبه وهو عماره .. فرق السن بيني وبين زماليلي 3 او 4 سنين من ضمن الحاجات اللي عملالي مشاكل .. تقريبا انا بكلم الدكاتره والمعيدين بطريقه احسن من اللي بكلم بيها زمايلي ..
انا اللي خلاني اكتب هنا حاجتين .. مش هعرف اتكلم في اي حته تانيه
وعشان الكبت وحش اوي اوي انا لو عرفت ان فيه شخص من الناس عرف حالتي هارتاح نوعا ما
اسف لو طولت عليكم
مشاكل الشباب النفسية
احساس بالذنب والنقص والكبت ها يقتلني
اضيف بتاريخ: Monday, January 8th, 2018 في 13:29
كلمات مشاكل وحلول: السعودية, الشباب, شاب, مشاكل, مصر
والله العظيم كأنك بتتكلم عنى بالظبط فى كل حاجة الفرق انى عانيت من اعراض اكتر من دى وبقالى خمس سنين ..الافضل تروح لدكتور نفسى لو فى امكانية كدة .بالله عليك تبطل حشيش لانه مش حل.وقرب من ربنا واحدة واحدة .اسجدله وابكيله واتذلل لربنا فى كلا صلاة .صلى قيام ليل ولو حتى ركعة واحدة .استغفر كتير .اسمع الرقية الشرعية .انت فى ابتلاء ولازم تقرب من ربنا.احمد ربنا انك فوقت بدرى وبتدور على حل .انا بقالى خمس سنين ولسة فايقة لنفسى وكل اللى اقدر اعمله لنفسى حاليا هو القرب من ربنا.انا مش عارفة ارتب كلامى بس لان رسالتك والله وجعت قلبى انا مش عايزة اى حد يمر باللى انا بامر بيه .انا قريت عن اللى بيحصلى وعرفت انه اكتئاب وفى علاج دوائى او سلوكى او جلسات نفسية والطبيب هو اللى بيحدد نوع الاكتئاب وحتتعالج منه ازاى.بس انا معنديش امكانية ازور دكتور نفسى.بالله عليك حاول تخرج من الحالة اللى انت فيها دى ومتسبش نفسك كدة لان سنة بتجيب سنة .اهم حاجة تقوى نفسك بربنا وتسعى للعلاج .لان المشاكل النفسية زيها زى العضوية بس احنا اللى بنخجل منها او مبنعترفش اصلا بيها .ربنا يشفينى ويشفيك .
شوف يااخي العزيز انت كويس وعال العال ولاتعاني من ايها مشاكل اومتاعب الحاجة التي تعاني منها هي فقدانك للثقة بالنفس ولازم تستعيد ثقتك بنفسك من ثاني وتحرص على التداخل الاجتماعي مع الاخرين وتبطل الخجل والكسوف اللي انت فيه وملازمك فانت شاب محترم ومن عيلة مثالية وعندك طموح عاوز تحققه وتبقا مهندس والمستقبل قدامك ولابد ان تهتم بدراستك في كلية الهندسة وتركز كل جهدك وتفكيرك في الحصول على شهادة الهندسة ولاداعي للاوهام اللي مسيطرة على عقلك وعيش حياتك ياابني مثل كل الشباب ودع عنك الشعور بالنقص او الذنب والكبت وخليك واثق من روحك جدا ومعتز بدينك واخلاقك وتربية الاهل لك وثقتهم فيك وربنا بيكرمك بكل الخير ويؤفقك ويسر امورك وعقبال مانشوفك بشمهندس قد الدنيا وناجح في عملك وبالله التوفيق