انا يا أخواتى كنت طالب متفوق لحد لما دخلت الثانوية العامة ونجحت سنه اولى بتفوق وبدون اى معاناه مع الدراسه او فى الامتحانات والحمد لله عديتها بتفوق.
بدأت السنه اللى بعدها ومش عارف ايه اللى حصل مبقتش ادخل المدرسة وجات الامتحانات وسقطت والسنه الى بعدها بردو نفس النظام.
انا دلوقت بقالى رابع سنه فى تانيه بس ولما فكرت اذاكر واخدها بجديه وانجح واتفوق زى الاول لقيت الناس اللى اصغر منى دخلت كليات.
انا نفسى اتسدت عن الدراسه مش قادر ابص فى كتاب، وفى نفس الوقت مش قادر اترك الثانوية وادخل دبلوم تجارة او صنايع مش لايق الا على ثانوى لما ميعاد الجيش ده وانا مش عارف اقدم ولا استنى اخلص ثانوى؟ ولو ربنا كرمنى بعدها بكليه وبعدين ابقى اقدم ولا اروح اقدم دلوقت والبس واكمل دراسه وانا فى الجيش؟
مع العلم انى دراسه منازل وهدخل الجيش بالاعداديه هيبقى تلات سنين، انا هتخوت مش عارف اعمل ايه.
بقيت عايش على البرشام الى اسمه تى دوول المخدر وعلى فكره من ضمن العقد اللى فى حياتى انا كان شكلى وسيم جدا وبشرتى بيضه محمره ولون شعرى اصفر وعنيا خضره وطويل كنت بلعب حديد وانا فى اول ثانوي فى تانيه، دلوقتى بعد البرشام بقيت حاجه متتشافش.
ارجوكم قولولى حل اغير بيه حياتى.. انا تايه …
انا دخلت الجيش دفعه ١ ٣ ٢٠٢١ ثلاث سنوات وهاخد الدبلوم السنه الجايه اعمل ايه
عندي 27 سنه في سنه ثانيه كليه وبقالي سنتين مش بروح الكليه نهائي انعقدت بعد وفاه والدتي ومش عارف اعمل ايه هل الكليه هتقبلني تاني ولا لا وايه مصيري في الجيش وهل ينفع اكمل كليه وادخل الجيش لو حد مر بنفس الظروف يرد عليه وشكرا جزيلا
ينفع اكمل دراستي بعد الجيش واي المتاح ليا انا معايا صنايع خمسه وعاوز اكمل دراستي ولسه مخلص جيش
السلام عليكم ورحمة الله وبركاته انا مريت بنفس الظروف الى حضرتك فيها دلوقتى وسالت نفسى كل هذه الاسئلة فنصيحتى لك انك لاتضع نفسك فى مفترق الطرق اولا لازم تبعد تماما عن اصحاب السوء وتنسى تماما انك فشلت بل هى ظروف وراحت لحالها خلاص فترة او مرحلة وعدت ويكون بداخلك ثقة فى الله ثم نفسك انت لو اكملت تعليمك باذن الله وبعدها دخلت الجيش يبقى انت كسبت ثقتك فى نفسك اولا ثم مستقبلك ثم نظرة الناس ليك بعدين ، اذا دخلت الجيش اولا لن تعود للتعليم مرة اخرى و ستكون نادما طوال العمر لانك ستكون قد خسرت كل شىء، انت الان فى الثانوية ولازم تكمل وتدخل الكلية الى انت ترغبهاوبعدها قدم نفسك للتجنيد ،فكر صح ماذا ستعمل ان لم تكمل تعليمك …
نصيحه من واحد فى الجيش دلوقتى
أوعى أوعى أوعى تدخل الجيش 3 سنين ولا سنتين
هتتعامل معامله زى الزفت و هتكره نفسك
حاول تاخد الثانويه بأى شكل
او تدخل ثانوى زراعى مثلا او صنايع و بعد كده تدخل معهد خاص 4 سنين علشان تبقى مؤهل عالى و تبقى سنه واحده جيش
بجد احسبها صح علشان متندمش
و ربنا يوفقك
علي فكره انتا ممكن تزاكر وتنجح ومنتخفش من اي حاجة بس اهم حاجة الجديه واهتم جدااا بالموضوع الاني انا 43 سنة وفي سنة رابعة كليه تجارة بس فعلا كل ما السن يتقدم المزاكرة بتكون اصعب .
حاول واسئل ازاي متخشش الجيش قبل ما تنجح في الثانوية العامة.
السلام عليكم
بصراحة موضوع تدخل الجيش ولا تكمل الثانوية دا فى ايدك . وانا من رايي انك لو ليك هدف معين ومصمم عليه اكيد لازم تكمل بس لازم تبعد عن كل اصحابك ومعارفك وحتى اهلك . لازم تقعد فى اوضة لوحدك وتتخذ قرارك وزى م بيقولوا (الفرق بين الفشل والنجاح خطوة) . اما لو انتا عايز تاخد كلية وخلاص فانا انصحك تأدم ف الجيش ومتقلقشى على مستقبلك والشغل زى م انتا عارف كله مبيلقيش شغل .
تقبل مرورى