كنت ابحث على عروسة ووجدتها على النت

انا شاب عندى 27 سنه بدأت شغل من وانا فى الثانوى واشتغلت فى البدية شغلانات وضيعه و مهينه (مع انى من اسرة ميسورة بس كان عندى طموح كبير اوى و الحمد لله حققت جزء منه ) وكنت بحوش (أوفر) واخذت كورسات كتيير ونميت نفسى ودرست 3 لغات و بفكر ادرس اللغة الربعه ودلوقتى بفضل الله شغال فى وظيفة كويسة ماديا و أدبيا كتير يحسدونى عليها. و ربنا عوض صبرى خير حتى ان مرتبى يساوى اضعاف مرتب من هم فى مثل سنى من اصدقاء الدراسة القدامى وكله فى الاول و الاخر من فضل ربنا عليّا .
و انا فى الكلية كنت بكلم بنات وصاحبت بنات بس بعدها وانا عندى 20 سنه ربنا هدانى و التزمت و عرفت ان كل ده كان حرام وغلط و بعدها اخذت عهد على نفسى انى مش هحب و لا المس اى بنت غير فى الحلال.
صحيح كنت بتعذب من جوايا و انا عايش بدون حب بس كنت بستحمل و اطلع طاقتى فى الشغل و الدراسه بس من جوايا نفسى احب و اتجوووز و اعمل كل اللى نفسى فيه (طبعا فاهمين قصدى)
المشكله انى راسم مواصفات معينه للإنسانه ايلى هاتجوزها اهمها انها تكون متدينه جداا و لبسها محترم لأنى غيور جدا و ماتكنش عرفت حد قبلى لأنى بقرأ عن بلاوى بسبب ان فى بنات مش قادرة تنسى حبها الاولانى مع انها بتبقى متجوزة من راجل محترم و خايف لما اتجوز اكون وقعت فى واحده من دول.
و اسرتى عاوزننى اتجوز اى واحده من بلدنا لأننا من الريف و بيقولو ايلى نعرفه احسن من ايلى ما نعرفوش ومش مهم لبسها و مش مهم ماضيها و مش مهم بتصلى و لا لأ. اهم حاجه (على حسب تفكيرهم السطحى) يلاقو نسب يتباهو بيه.
وانا طبعا مستحيل اخد برأيهم لأنى متأكد ان رأيى هو الصح لأنى باتّبع حديث الرسول (فاظفر بذات الدين) لكن هما مافيش حاجه تدل على صحة وجهة نظرهم غير المظاهر الفارغة و شكلنا اودام الناس.
و بناء عليه مش لاقى اللى انا بتمناه فى اللى حوليّا و قولت هاصبر لغاية لما الاقى الانسانه المناسبه .
و فى يوم كنت على النت و لقيت منتدى و فيه قسم للزواج بس قسم الزواج ايلى فيه مختلف عن مواقع الزواج التانيه بمعنى ان المنتدى ده بيعرض مواصفات البنت و مؤهلاتها بدون صور ومواصفات شريك حياتها ايلى عوزاه و مافيش تواصل مباشر لكن التواصل بيكون عن طريق مشرفات المنتدى لضمان الجديه من الطرفين.
ولقيت انسانه فيها كل ايلى انا عاوزه من التدين وحفظ للقران والجمال بس ازاى اقول لأهلى انى ناوى اتجوز من على النت؟؟؟
و فى رأيكم ليه البنت عموما ممكن تطلب الجواز من على النت ؟؟؟!!!
و لو انتو مكانى تعملو ايه و تنصحونى ب أيه ؟
ارجوكم ردو عليا لأنى محتاج لكل رد هيتكتب و هيفرق معايا كتير .

مشاكل وحلول ذات صلة

• انا مش لاقى البنت اللى احبها
• اهلها رفضوني وانا مش عايزها تضيع مني او تتجوز حد غيري
• شافولي عروسة اعجبت بيها وحبيتها وهي موافقتش
• كنت حموت في ايد حبيبي وكرهته
• هل أوافق على العريس وأنسى انه غريب عني
• لا اعرف كيف اختار زوجه ولا اتعرف على بنت
• سقطنا في الزنا ولا اريدها لضعف دينها