مشاكل الشباب قبل الزواج

كنت ابحث على عروسة ووجدتها على النت

انا شاب عندى 27 سنه بدأت شغل من وانا فى الثانوى واشتغلت فى البدية شغلانات وضيعه و مهينه (مع انى من اسرة ميسورة بس كان عندى طموح كبير اوى و الحمد لله حققت جزء منه ) وكنت بحوش (أوفر) واخذت كورسات كتيير ونميت نفسى ودرست 3 لغات و بفكر ادرس اللغة الربعه ودلوقتى بفضل الله شغال فى وظيفة كويسة ماديا و أدبيا كتير يحسدونى عليها. و ربنا عوض صبرى خير حتى ان مرتبى يساوى اضعاف مرتب من هم فى مثل سنى من اصدقاء الدراسة القدامى وكله فى الاول و الاخر من فضل ربنا عليّا .
و انا فى الكلية كنت بكلم بنات وصاحبت بنات بس بعدها وانا عندى 20 سنه ربنا هدانى و التزمت و عرفت ان كل ده كان حرام وغلط و بعدها اخذت عهد على نفسى انى مش هحب و لا المس اى بنت غير فى الحلال.
صحيح كنت بتعذب من جوايا و انا عايش بدون حب بس كنت بستحمل و اطلع طاقتى فى الشغل و الدراسه بس من جوايا نفسى احب و اتجوووز و اعمل كل اللى نفسى فيه (طبعا فاهمين قصدى)
المشكله انى راسم مواصفات معينه للإنسانه ايلى هاتجوزها اهمها انها تكون متدينه جداا و لبسها محترم لأنى غيور جدا و ماتكنش عرفت حد قبلى لأنى بقرأ عن بلاوى بسبب ان فى بنات مش قادرة تنسى حبها الاولانى مع انها بتبقى متجوزة من راجل محترم و خايف لما اتجوز اكون وقعت فى واحده من دول.
و اسرتى عاوزننى اتجوز اى واحده من بلدنا لأننا من الريف و بيقولو ايلى نعرفه احسن من ايلى ما نعرفوش ومش مهم لبسها و مش مهم ماضيها و مش مهم بتصلى و لا لأ. اهم حاجه (على حسب تفكيرهم السطحى) يلاقو نسب يتباهو بيه.
وانا طبعا مستحيل اخد برأيهم لأنى متأكد ان رأيى هو الصح لأنى باتّبع حديث الرسول (فاظفر بذات الدين) لكن هما مافيش حاجه تدل على صحة وجهة نظرهم غير المظاهر الفارغة و شكلنا اودام الناس.
و بناء عليه مش لاقى اللى انا بتمناه فى اللى حوليّا و قولت هاصبر لغاية لما الاقى الانسانه المناسبه .
و فى يوم كنت على النت و لقيت منتدى و فيه قسم للزواج بس قسم الزواج ايلى فيه مختلف عن مواقع الزواج التانيه بمعنى ان المنتدى ده بيعرض مواصفات البنت و مؤهلاتها بدون صور ومواصفات شريك حياتها ايلى عوزاه و مافيش تواصل مباشر لكن التواصل بيكون عن طريق مشرفات المنتدى لضمان الجديه من الطرفين.
ولقيت انسانه فيها كل ايلى انا عاوزه من التدين وحفظ للقران والجمال بس ازاى اقول لأهلى انى ناوى اتجوز من على النت؟؟؟
و فى رأيكم ليه البنت عموما ممكن تطلب الجواز من على النت ؟؟؟!!!
و لو انتو مكانى تعملو ايه و تنصحونى ب أيه ؟
ارجوكم ردو عليا لأنى محتاج لكل رد هيتكتب و هيفرق معايا كتير .

مشاكل وحلول ذات صلة

اضيف بتاريخ: Saturday, October 21st, 2017 في 17:08

كلمات مشاكل وحلول: , , , ,

ردود to “كنت ابحث على عروسة ووجدتها على النت”

  1. ابوالبتول
    22/10/2017 at 16:35

    والله انك يااخي شاب طموح ومكافح في حياتك وتستاهل كل الخير اللي انت وصلت اليه وربنا يزيدك كمان وكمان وعنجد الكل بيفخر فيك ولوعندي بنات في سن الزواج لزوجتك لاني بشترى راجل بمعنى الكلمة وكل اللي قولته هوعين الصواب اياك ان تتزوج وحدة ماتعرفش عنها شي او تكون غير مناسبة لك سوا من ناحية التعليم او الثقافة او التدين نعم عليك بذات الدين فهذا هوالاصل في الزواج ومسالة انك تعرفت على وحدة من خلال مواقع الزواج عبر النت وتقول انها تتوفرفيها كل المواصفات اللي تطلبها في شريكة العمر فلاانصحك بالزواج من خلال هذى المواقع لان اغلبها كله خداع واكاذيب وتضليل كثيرا من الناس تورطوافي زيجات بهذا الشكل من خلال النت انت شاب متعلم ومتدين وباين عليك من عيلة كويسة ومحترمة احسن الاختيار الجيد للزوجة ولاتنخدع بالجمال او المظاهر الكذابة وبالنسبة لسؤالك ليه البنت تلجا لتلك المواقع لاجل الزواج فالجواب بعضهن تقدمن في العمر وخايفات من شبح العنوسة ولاحدش تقدم لهن فيلجن لتلك المواقع عبر النت وبعضهن يرغبن في الزواج من رجال اثرياء من اجل المادة والبعض منهن يمارسن الغش والخداع والنصب على الشباب من اجل اقامة علاقات غير شرعية فاحذر كل الحذر من تلك المواقع عبر النت وابتعدعنها وربنا بيكرمك بالزوجة الصالحة التي تقرى به عيينك وتلاقي معها الخيروالسعادة وراحةالبال والاستقرار طوال عمرك

اترك رداً أو حلاً لهذه المشكلة