مشاكل الشباب مع البنات

حاسس بانجذاب ناحيه بنت

بسم الله الرحمن الرحيم

ازيكم يا جماعه ?
انا عامل التوبيك ده علشان اطمن عليكم بس
اوعى تكوناوا صدقتوا يعنى انا جاى اطرح مشكلتى النهارده واتمنى تنصحونى بحل وبرضوا بأصبح عليكم
انا شايف واحد بدأ يخلع الجزمه وشكلى بينشن عليا فاخش فى الموضوع علطول

انا باكلم بنات كتير على النت بس مش فلانتينو ولا هارت بريكر انا باكلمهم على انهم اخواتى والله وبأكن ليهم كامل الأحترام وباحاول ابقى اخ ليهم
بس فى واحده كلمتها من فتره وهى أصغر منى بتلات سنين تقريبا وانا 19 سنه
المهم حاسس بتجاذب ناحيتها زى ما بيقولوا وكلامى معاها طبيعى زى اى اتنين صحاب بيتكلموا يعنى ما قولتلهاش اى حاجه لسه
المشكله مع الوقت بأحس انى باتشد ليها أكتر وده يمكن راجع لعوامل كتير مممكن تكون :
حاسس بتشابه فى صفات معينه
فيها صفات انا بحبها
باحس انى طبيعى وانا بكملها

اممممممم ويمكن حاجات تانيه كمان

المهم

بافكر ابعد عنها لأنى خايف مع الوقت اخش فى حوار حب والكلام ده
وانا يمكن عشت الحكايه دى قبل كدا وده سبب المشكله
انى واحده قبلها عجبتنى جداا وبرضه حسيت بانجذاب كبير ناحيتها يمكن لنفس الأسباب
لكن الفرق فى المره دى انها مش عصبيه زى الأولى وانها بتتأسف لو حصل مشكله
المهم
الأولى كلمتها تقريبا 10 شهور ومسكت نفسى بالعافيه انى ما اصارحاش بمشاعرى لأكتر من سبب منهم
مش عاوز اخش فى حوار حب على النت باحس انه مشاعر بادره كدا وبحس انه فاشل 😀
كمان كنت مش عاوز ادبسها معايا فى حوار انا ممكن ما ابقاش قده واسيبها بعدين واسببلها جرح او زعل
خفت اصارحها بمشاعرى وبعدين اكتشف انها كانت مشاعر مؤقته وبرضه ادبسها معايا واسيبها بعدين واجرحها
وبعد ال 10 اشهر اختفت من حياتى وده لأنها كانت عصبيه وبتتشاكل علطول ومع ذلك كنت باصالحها حتى لو هى الغلطانه
لكن جت فى يوم وقالتلى مش هينفع نتكلم مع بعض قولتلها ليه؟ قالتلى حاسه انه غلط ومش عارف ايه مع انى كنت باعاملها والله كأخت ليا وعمرى ما حاولت اخرج من الأطار ده وزى ما قولت مارضتش اصارحها بمشاعرى خلال 10 اشهر
وقفلت بدون ما اعرف السبب

ولذلك يمكن تكون دى مسببه ليا مشكله وخوف تجاه أى علاقات جديده ولذلك عاوز ابعد عن البنت التانيه دى
لكن ياترى حتى لو بعدت ؟ المشكله هتتحل؟
حاسس انها هتتعقد اكتر وهابعد عن كل واحده احس ناحيتها بمشاعر فى الحقيقه …

مش عاوز اخد قرار واندم عليه بعد كدا
مش عاوز اقول للبنت التانيه دى انها حاسس ناحيتها بكذا وكذا وبعدين اكتشف انه كان مجرد مشاعر لحظيه وتنتهى واعذبها معايا
انا مش هاستحمل انى اكون سبب جراح لأى حد لأنها بجد صعبه جداا

نفترض الأفتراض التانى
ان المشاعر دى مش وقتيه وانى فعلا معجب بيها
ياترى هو صح انها اقولها كدا على النت واعيش معاها الحوار ده على النت؟
ياترى اسيب النت كله واختفى من حياه اى حد على النت؟

فى جانب تانى لازم تعرفهوا برضه علشان تدوا الحل الصح
النت يعتبر كل حياتى لأنى ماقدرتش اكون علاقات فى الحياه العاديه
او انا كنت بأدور على شخصيات معينه لكن مالقتهاش فى الحقيقه
مش بادور على شخص كامل
بس حاولت ادور عل حد يفهمنى
حد يكون ليه بعض من اهتماماتى… مش كلها !!

لكن مالقتش او يمكن لقيت بس هو ماحبش يصاحبنى مثلا
وبالنسبه للبنات فى الحياه بره مليش اى اختلاط بيهم نهائيا
ويمكن اخاف جدااا اروح اكلم واحده معجب بيها او كدا
مع ان على النت أى حد كلمته سواء بنت او ولد بيقولوا عليا صايع وخبره
وده علشان شخصيتى على النت مختلفه عن الواقع تماما فعلى النت انا دمى خفيف وصايع صايع يعنى مش باتكسف خالص يعنى لو جيت ادى نفسى درجه فى الجرأه على النت من 200 درجه هاخد 1 لكن فى الحقيقه 200 😀

البعض هيقول طب وانت ياترى نسيت البنت الأولى دى ولا لأ
الصراحه مش عارف جاوب للأسباب التاليه
انا لحد الأن مش عارف ياترى ايه الظواهر والسمات اللى أقدر من خلالها اقول انا فعلا بحب فلان او بحب فلانه؟
للأسف معرفتش الاقى اجابه لده ولذلك مش عارف احدد مشاعرى تجاه الشخص ده كانت ايه والشخص ده كانت ايه
لكن اللى اقدر اجاوب عليه ان مشاعرى ايجابه تجاه البنت الأولى والتانيه لكن يمكن الأولى فيه شويه خلاف على تصرفاته وصافتها وحسيت مع الوقت انها مش مهتمه بيا من خلال تصرفاتها لكن كلامها كان العكس فكانت بتعتبرنى كشخص مهم جدا فى حياتها
اما البنت التانيه فكلامها وتصرافتها بتقول انها بتعتبرنى شخص مهم فى حياتها

لحد الأن برضه ما عرفش ايه كانت مشاعر الأتنين تجاهى …

اممممممممم
الموضوع معقد جدا فأرجو من اى شخص يقول حل يلتزم بالتالى (شحات وبيتشرط ) 😀

أول حاجه هدى اعصابك كدا وصدقنى انا مش هاموت لو المشكله ما اتحلتش 😀
عاتى خالص واصلا انا حاسس انى جاى اصبح عليكم مش باكتب مشكله وعمال اسمع David Guetta
الراجل ده مزاجه عالى بس الموسيقى بتاعته شديده و Armin Van Buuren أهدى منه 😀
الأخ بتاع الجزمه شكله بينشن تانى خلاص يا عم هدى اعصابك

ياريت يا جماعه اللى يكتب رد ما يتكلمش على نقطه ويسيب بقيه النقاط
يجى يقولى مثلا : يا عم حاول تصاحب ناس بره ومش عارف ايه
عاوز واحد يبص للموضوع نظره كبيره ويبصله كليا مش جزئيا

ياريت لو حد مر بتجارب مماثله يحط رأيه علشان أكيد هنستفيد منه

مش باتشرط والله بس علشان اللى يكتب رد يكون رد يحتوى على حل مش تعقيد للمشكله أكتر
لأنى احيانا الاقى واحد داخل يقولك:-
يا أخى حرام عليك نفسك انت أيه أتقواا الله وده باحس انه واخد علقه واتعرض لتعذيب كتير وعنده نوبات غضب وجاى يفرغ الشحنات السالبه دى علينا

احب اقولك بقى انك وصلت لأخر الكلام وبجد أحييك على انك وصلت لهنا لأنك بجد عندك اصرار وعزيمه جامدين اوى فخد بالك منهم ^_^

شكرا يا جماعه
وباهزر ومحدش يزعل منى لأنى مش باحب حد يزعل منى بسب سوء تفاهم لأنى باحب ازعلهم مع سبق الأصرار والترصد 😀
ملحوظه صغيره:   حاسس ان فى ناس بدأت تشك فيا ^_* انا سليم وربنا 😀

جميع الحقوق محفوظه لصاحب المشكله وحصريا على موقع مشاكل وحلول .. أحذروا التقليد
وعقبال لما نحل مشاكلكم
مش هاقول يارب ما تعيشوا فى مشاكل ابدأ لأن ده مستحيل بس هادعى ربنا انكم لما تواجهوا مشاكل تقدروا تحلوها

سلامات

مشاكل وحلول ذات صلة

اضيف بتاريخ: Thursday, December 28th, 2017 في 04:02

كلمات مشاكل وحلول: , , ,

اترك رداً أو حلاً لهذه المشكلة