بسم الله الرحمن الرحيم
اخوانى الاعزاء انا متزوج من 4 اشهر و كان زواجى زواج صالونات عادى زى كتير مننا شوفت البنت و كانت كويسة و اهلها كانوا فى قمة الاحترام و الاخلاق و التدين حبيتها و اوى اوى و حسيت انها بتحبنى بس كسوفها و قلة خبرتها منعنها من انها توصلى الاحساس ده
استمرت الخطوبة 6 شهور و اتجوزنا و قضيت احلى 3 اسابيع فى حياتى
ما تستغربوش هم فعلا 3 اسابيع بس بعد كده حياتى بدأت تبقى جحيم البنت متعلقة بمامتها جدا و بدأت تبعد عنى عشانها و بدأت المشاكل تزيد قبل ما اكمل شهر جوازو عشان ترضى امها كانت عايزانا نعيش عندها مع العلم ان اخوها متجوز بقاله سنة و نص و برده قاعد معاهم فى البيت هو و مراته
انا بطبيعة شغلى بقعد فى البيت 10 ايام فى الشهر و الباقى فى شغلى طلبت منها اننا نقضى و قت فى البيت و لما اسافر تروح هى عندهم.
رفضت و قالتلى ان امها هتزعل منها و هتهجرها زى ما عملت اول مرة – اللى كانت بعد جوازنا ب 21 يوم – مراتى روحت معايا البيت امها زعلت منها و هجرتها اسبوع
المهم يوم ورا التانى مراى اهتمامها بيا بيقل و اصبح اهم حاجة عندها امها و ابوها و اخواتها وحتى كمان قرايبها و على الرغم من انى قولتلها انى متضايق من قلة اهتمامها بيا و انصرافها عنى لكن معملتش حاجة و استمرت فى نفس المعاملة و اكتر
بقيت بنزل اجازة اتخانق 3 و 4 مرات معاها و كل كلامنا بتقوله لامها حتى اللى بيحصل بينى و بينها فى اوضة النوم بتحكيه
انا كمان بدأت ابعد لان مش معقول هتزلل لمراتى عشان تاخد بالها منى و بيتنا مقفول على طول و قاعدين عند اهلها و كل ده استحملته عشان بحبها
فاض بيا الكيل و بدأت اتفرج على الافلام الجنسية و بعدت عنها و بعدت عنى و على الرغم من انها حامل محستش بالفرحة زى اى راجل و بقت حياتنا مقرفة و بقيت بتمنى اليوم اللى ارجع فيه الشغل
بالصدفة مراتى عرفت انى بتفرج على افلام و طبعا كالعادة كل اهلها عرفوا و زى ما يكونوا كانوا مستنيين غلطة و عملولى مجلس تحقيق بس كان فى التليفون لانى كنت فى الشغل ساعتها و كلموا اهلى و قالولهم و عملوا فضيحة مع انى سكتت كتير على حاجات فى حقى عشان عيب لما اعمل كده فى
مراتى قدام اهلها
المهم نزلت اجازة و مرحتش عندهم و قاعد فى بيتى و بقالنا شهر على الحال ده مع ان والدى كان عايز نروحلهم و نحل بس هم مش عايزين و عايزين يسيبونى كده مشوفش مراتى عشان احس بغلطى.
انا عارف انى غلطان بس هى كمان غلطت فيا كتير اوى و جت على حقوقى كتير اوى و مواقف كتير انا مقولتهاش هنا
انا عايز اعرف اروح ارجعها و لا الزوجة اللى تبعد عن جوزها شهر من غير ما تسال عليه حتى من وراه تبقى مش بتحبه
انا بحبها اوى بس هى مش بتحبنى و لا بتحس بيا نفسى اعرف احسن حاجة اعملها ايه مع العلم انى مصلى و استغفرت ربنا كتير على الغلطة ديه حتى من قبل ما هى تعرف
ياريت تساعدونى
مشاكل الازواج
متزوج حديثا وحياتي مع مراتي مقرفة
اضيف بتاريخ: Friday, August 18th, 2017 في 22:30
كلمات مشاكل وحلول: الخطوبة, بنات, بنت, حامل, متزوج
اتجوز عليها ولو طلبت الطلاق طلقها وربنا يوعدك باللي تعوضك عنها، إنما تقوللي اروحلها واصالحها تبقى بتقويها على عدم اهتمامها بيك وعلى نشر أسرار بيتك برة وفضح أخطاءك على الملأ وانت لسة في بداية الجواز يعني لا فيه عشرة ولا ولاد كتير وانت مش أول ولا آخر واحد يتجوز على مراته، غير كدة ماترجعش تشكي منها تاني لأنك انت اللي سامحت واديتها الفرصة
انتما مازلتما في بداية الزواج
اخي زوجتك مخطئة بالتأكيد يجب عليها الا تخبر اسراركم لاحد ولكنك ايضا اخطأت كيف لانسان يصلي ويخاف الله ان يشاهد هذه الافلام القذرة بحجة تصرفات زوجته او لاغاضتها.على كل حاول تتصالح معهم ويجب ان تشترط عليها عدم اخبار اهلها بأسراركم بعد الان والا فسوف تطلقها,وانا برأيي لا تطلقها لانها حامل بل انا متأكدة هي الان تنتظر لكي تأتي وتأخذها وخاصة انها حامل ولا اعتقد انها تتمنى الطلاق .
مش محتاجة كلام كتير ولا حل … الست اللي تطلع مشاكل البيت او اللي بيحصل ف البيت لان اي نفس بتاخده بتحكيه لامها واهلها راي تطلقها لان حياتك هتبقي جحيم انت كدا ظهرك عريان بمراتك .. واتجوز واحدة تصونك احسن وربنا يسعدك
اخي الفاضل شخصبتك الضعيفة امام مراتك واهلها خلتهم يعملوا فيك كلهذا كان عليك من البداية وقف تدخل امها في حياتكم الزوجية وماتسمحش لزوجتك بنقل اسرار حياتكم الزوجية لااهلها وتوبخها على فعلها العير اخلاقي ده الست المحترمة والمتربية ماتعملش كدا وتقول اسرار بيتها وحياتها مع زوجها للاخرين حتى لوكانوا اهلها لكنك تساهلت في الموضوع ده وتغاضيت عنها وعن تصرفاتها وهذا جعلها تتمادى في اهانتك وتقليل من قدرك كزوج لها ومسوول عنها صدقنى ماعاد يجدي معها نصائح او امل في صلاح حالها من الافضل انك تطلقها فورا وتشتري سعادتك وكرامتك وربنا بيكرمك بخير منها مليون مرة بنات الحلال كثيرات وان شاء الله هتلاقي الزوجة الصالحة اللي تستاهلك وتقدر الحياة الزوجية وتحافظ عليها وتسعدك طوال حياتك تحياتي لك واتمنى لك دوام التوفيق والخيروالسعادة في هذة الحياة