بكره ابويا اللى اكيد تعبنى نفسيا

السلام عليكم ورحمة الله جميعا
بداية………….
مش عارف هل انى القى عليكم السلام اللى هو تحية الاسلام يعنى ده صح واللا غلط اصل انا بصراحة حاسس من ظروف حياتى انى قريب اوى يمكن من الكفر والعياذ بالله انا عاوزكم تساعدونى يا جماعة وماحدش يفهم كلامى غلط

اولا انا ابن لاب كان مطلق وتزوج بعدين فأنا اكبر ابنائه الذكور وفيه بنت من ام تانية اكبر منى المهم يعنى يا جماعة ابويا ده انا احترت فى امره مش عارف هو ايه بالظبط بس فى بعض الحقايق اللى انا متاكد منها عنه اول حاجة انه انطوائى وفاشل اسريا واجتماعيا والدليل على كلامى ده انه ناصح جدا فى معاملة الناس لانه ديما بيسىء الظن بيهم لكن الغريبة انه علاقاته الاجتماعية مع الناس انطوائى ما بيحبش يروح لاى حد فى اى مناسبة سواء حزن او فرح هو له اخت واحدة بس وتقريبا كده والله اعلم انه بيعبدها عبادة وهى ليها كام بنت بيحبهم اكتر من اختى غير الشقيقة اللى انا قولت عليها فى البداية فمعنى كلامى انه علاقته الاجتماعية كلها منحصرة فى اخته دى وبس ، طيب هو فاشل اسريا ليه؟؟؟ اه هو فاشل اسريا لانه ما عرفش يربينا انا واخواتى هو تقريبا يعنى ما ربناش يعنى هى حياته كلها تتلخص فى الشغل وبعد الشغل يتفرج على التيليفزيون وبعد التليفزيون ينام على طول غير كده ما بيعملش يعنى مثلا عمره ما قعد اتكلم معانا وعلمنا حاجة تنفعنا ولو قعد معانا مثلا فى مرة ديما يحتقر امى ويسخر منها ويسخر مننا ومن اشكالنا وصفاتنا وديما يحسسنى انى اقل من الحيوانات وهو سبب لى دمار فى شخصيتى يعنى انا اتعلمت منه السخرية على الغير انى اسخر من امى واخواتى وزمايلى فى المدرسة لحد ما كل زمايلى كرهونى وبقيت مدمر اجتماعيا واصبحت انطوائى وكمان هو كان بيمنعنى انى العب مع الولاد فى الشارع وكان بيمنعنى كمان من الشغل فى اجازات الدراسة بحجة انه خايف عليا وانه مش عايز يشقينى فى الحياة ويورينى مرارتها وطبعا انا طلعت ضعيف جدا وعضمى طرى ما اتعلمتش اى صنعة اكل منها عيش وكمان ما قدرتش استمر فى شغلانة روحتها بعد ما كبرت لانى مش متعود على اى شغل يعنى من الاخر انا طفل فى هيئة شاب ده بقى غير موضوع الدراسة يعنى هو غصب عليا انى ادخل كلية ما بحبهاش خالص وبكرهها كره العمى وكانت نتيجة كده انى سقطت فيها سنتين وحولت منها لكلية تانية من وراه واصبحت فااااااااشل درااااسيا ومش عارف اشتغل لحد دلوقتى لا فى شغل بشهادة لانى لسا ما اتخرجتش ولا فى شغلانة تانية( صانعة مثلا)وطبعا انا دلوقتى شاب زى اى شاب عايز اتجوز وابتدى حياتى وفى بنت نفسى ارتبط بيها بس طبعا هو مش راضى يساعدنى وكمان قالى انا ماليش دعوة بيك فى مصرافيك يعنى انا قاعد فى البيت حاليا ومش بيصرف عليا على الرغم انى لسا ما خلصتش دراسة وده مش فشل منى لاء ده بسببه هو لانه اجبرنى انى ادرس حاجة ما بحبهاش وطبعا هو بيهزقنى كل شوية ويشتمنى لانى مش بشتغل وبيقول لى انى حمل عليه طب انا بس عاوز افهم حاجة انتا ازاى تجيب واحد وبعدين تكتفه وبعد كده تقول له قوم اشتغل واعمل الشىء الفلانى طب ازاى يا جدعان وهو متكتف انا تقريبا زى حد واحد قطع له درعاته وقاله روح اشتغل هههههههه طب هيشتغل بايه؟ برجله؟ لا اله الا الله المهم يعنى انا دلوقتى مدمر نفسيا عايش فى الفشل على الرغم انى مش فاشل يعنى انا بقدر نفسى كويس انا الحمد لله يعنى على قدر كبير من الثقافة وبحب القراءة جدا ودماغى شغالة يعنى انا مش من الشخصيات اللى كل همهم السجاير والحشيش والبنات لاء انا بحب التعليم بس انا متعثر فيه بسبب انى غبى غبى لانى طاوعته ودخلت كلية ما بحبهاش اانا لحد كده كنت بتكلم عن علاقة ابويا بيا انا بس انا لسا هتكلم عن علاقته بامى واخواتى اولا بامى :- انا لما كبرت عرفت انه اتجوز امى لسبب واحد بس مالوش تانى انها بتشغل ومعاها فلووووووس يعنى مصدر ياكل منه عيش مش اكتر يعنى مافيش حب ولا تفاهم هو بيكرهها اصلا وابويا ده بقاله تقريبا 10 سنين ما بيصرفش علينا يعنى من وانا عندى 13 سنة امى بس هى اللى بتصرف علينا وطبعا هو بينكر كده وبيقول احنا بنقسم المصاريف مع بعض يعنى هو مثلا اكل وشرب وهى تعليم ودروس طبعا كل ده كدب لانه عايش فى البيت لوحده واحنا وامى عايشين لوحدنا وديما ما بيكلموش بعض فى يعنى بينهم خرس زوجى او من الاخر يعنى (طلاق نفسى) المهم يعنى امى بنت لينا انا واخواتى كل واحد شقة وراحت اخدت قرض علشان تعرف تعمل كده القرض ده بقى ما بيخليهاش تقبض غير 50 جنيه فى الشهر من مرتبها يعنى لو عاشت لوحدها وهو ده الواقع فعلا مش هتلاقى تاكل المهم ان الناس طبعا اللى حوالينا مفكرين انه هو اللى بانى الشقق دى وانه الاب المثالى طيب يا جماعة هو دلوقتى مقعدنا فى شقة لوحدنا وهو قاعد لوحده فى شقة وبياكل ويشرب لوحده وما بيصرفش خالص علينا وانا واخويا لسا بندرس والتالت هيدخل الجيش طيب ندخل بقى على علاقته باختى (الغير شقيقة)اختى دى متجوزة من واحد ربنا غضبان عليه راجل ظالم يعنى المهم ديما بينهم مشاكل وبيغضبها كتير اوى وفى مرة ابويا قرر يطلقها منه وهى يا عينى كانت زعلانة جدا ونفسها تقتل جوزها ده ووافقت على الطلاق فعلا بس لما هديت وفكرت بعقل وصعبت عليها بنتها تتاخد منها فرفضت الطلاق لكن هو صمم انه يطلقها ويدمر مستقبلها قامت هى بغبائها وضعف حيلتها هربت منه على بيت جوزها طبعا لما ده حصل هو اتجنن وغضب عليها وكرهها وما رضيش يسامحها تانى وبيدعى عليها بالمقابل بقى هو مع بنات اخته زى ما يكون ابوهم الحقيقى بيحبهم لدرجة الهبل بزمتكم انتو شوفتو اب يكره بنته ويحب بنات غيره؟ لا حول ولا قوة الا بالله المهم انا دلوقتى عايز ابتدى حياتى بس بصراحة انا مش عارف ابتديها واللا انهيها؟ احيانا كتير والله بفكر انهيها بس انا فى بنت بحبها اوى ونفسى اتجوزها لانها بنت متزنة فى كل شىء وهى دى اللى هتربى لى اولاد ناجحين فى دنياهم واخرتهم بس المشكلة انها ممكن تتخطب فى اى لحظة واخسرها للابد وانا عايز اخطبها بس انا مش شغال ولا عندى امكانيات وابويا ده بقى بيصرف ببزخ ويقدر يحل لى مشكلتى بس لو فرضنا جدلا انه حلها لى وجوزنى البنت دى هل حياتى معاه فى بيت واحد هتكون حياة سليمة يعنى لما هى تشوف الوضع اللى عندنا فى البيت واننا عايشين فى سجن واهل بيكرهو بعض ده هيؤدى لحياة ناجحة؟ انا والله تعبان اوى ومش عارف اعمل ايه حاولت التزم كتير واقرب من ربنا لكن مشاكلى بتربى جوايا كره لاقرب الناس ليا ازاى بقى هقرب من ربنا وانا نفسيا مش متزن ؟ وانا حاسس انى فى حاجة عندى غلط . اسف انى طولت عليكم بس كان نفسى افضفض اوى وياريت تردوا عليا بردود تخرجنى من اليأس اللى انا فيه ده وشكرا لسعة صدركم.

مشاكل وحلول ذات صلة

• هل أتزوجه خوفا من شبح العنوسة
• خيبة بعد الزواج واشمئزاز من زوجي
• تعدي اب على بناته وهتك عرض
• نفسي اتجوز جدا لكن مفيش عرسان خالص
• عاوزة ربنا يباركلنا و نتجوز كده اكون غلطانة
• الخوف من الارتباط والزواج للبنات
• الحب ام المستقبل