مشاكل البنات النفسية مشاكل عائلية

كرهت امي بسبب كلامها مع راجل غريب

انافتاة20 سنة واخوتي في مثل هذا السن مشكلتي هي امي كل يوم بتكلم واحد غريب علي الموبايل بالساعات ولو اتصل وهي نايمة تصحي ترد ولو حتي دخلت الحمام بيكون الموبايل معاها علي غير عادتها هي شغالة وابويا عارف انها وارد تكلم زمايلها عادي بس ميعرفش انها بتكلم الراجل ده تحديدا بقت مشغولة عننا خالص وبقت تشحن في اليوم مش اقل من كارتين شحن والمصيبة الاكبر ان كل اسرارنا خارجة للراجل ده مهما كانت كبيرة او صغيرة في البيت انا كل يوم بشوفها وبسمعها بتكلمه لكن بتفضل توطي صوتها او تدخل في اوضة لوحدها او تعمل نفسها نايمة ولما جيت قلتلها مين ده قالتلي ملكيش دعوة بس انا مرتبطة بشاب كويس وهي كانت مصحباني وبحكيلها بس حسيت في عنيها اني لو اتكلمت هي كمان هتتكلم والادهي انه ممكن يكلمها بليل ومش عارفة بيقولوا ايه ومين ده وكمان بتعمل نفسها قدامنا بتتكلم في الشغل بس مرة واحدة تقوم من لاوضة وصوتها يختفي اناحاسة زمانه بيقول ان معندناش رجالة عشان تتكلم عادي كده قدامهم انا بجد مش طايقاها في البيت ومش لاقيه حل واخويا ثانوية عامة وهيخطب وهي مش مهتمية حتي يوم ما راح اتقدم فضلت انده عليها تحضر معايا حاجاته وبدلته لقيتها عمالة تتكلم في الموبايل ومش مهتمية في مرة خلتني اكلمه قالتلي خدي سلمي علي زميلي رحت كلمته وقعد يسلم عليا وكان صوته راجل عنده حوالي 50 سنة بس انا كلمته من قبل ما الموضوع يتطور بينهم كده
انا خايفةاتهور واخد رقمه واكلمه بس مش عارفة اقوله ايه وكمان اخاف يكون حد مهم عندها في الشركة ويأذيها ويلفق لها اي تهمة في الشغل عشان ينتقم
انابجد تعبانة ومش عارفة اعمل ايه وابويا غلبان وطيب وميعرفش انها بتكلم حد غريب

مشاكل وحلول ذات صلة

اضيف بتاريخ: Sunday, March 27th, 2011 في 17:07

كلمات مشاكل وحلول: , , , ,

20 رد to “كرهت امي بسبب كلامها مع راجل غريب”

  1. مايو المصرية
    09/04/2012 at 22:07

    بصى بصراحةالموضوع صعب اوى لكن راى انك تعرفى باباكى بالموضوع بتاعك الاول وبعدين اسالى مامتك علي الراجل الى بتكلمو بثقةعلشان لو قالت لباباكى هيكون عارف منك وربنا معاكى وياريت تعرفينا عملتى ايه

  2. الطفله البريئه
    11/01/2012 at 06:28

    رأيى انك تتكلمى معاها هى بحيث تفسر لك الموضوع وتقوليلها انك مش عاجبك الوضع دا بمعنى انك تقوليلها كل اللى جواكى
    وبالنسبه للناس اللى قالو انك تكلمى باباكى مع احترامى ليهم مش انصحك بى كدا لان الراجل مهمها كان عقلانى وطيب وبيحب مراتو مش ممكن يتهاون فى الموضوع دا ولو حتى سامح حفاظا على الاسره مش هينساه فا ليه تعملى شرخ ممكن اصلا يتفادى قبل مايحصل فابلاش تكونى سبب فى هدم بيتكم مادام فى حل مالهوش اضرار
    وربنا هيساعدك انشالله

  3. KaLoOoSh
    13/09/2011 at 12:24

    وابوكى فين من كل ده ؟؟
    ابوكى لو عرف وراجل هيوقف المهزلة دى

  4. banota
    05/07/2011 at 18:51

    اتكلمي مع مامتك لو مقبلتش كلامك
    شوفي حد عاقل
    ويفضل يكون باباكي لو باباكي عقلاني كلميه براحة وبهدوء وقليلوا يتعامل بذكاء ده رايي ومش عارفة صح ولا غلط ياريت الناس تفيدنا بالتصويت ربنا معاكي

  5. أحمد
    18/04/2011 at 06:45

    الأمر خطير ، وكلمي بباك وبعقلانية ، عشان دي أسرة ، وبسرعة تكلميه حتى لا يتطور الأمر . ربنا يصلح الحال .

  6. منه
    16/04/2011 at 20:31

    ممكن تكون ممامتك بتعمل كده عشان عاوزه تدوقك القلق اللى بتقلقه عليكى لما بتكلمى الولد اللى بتقولى عليه تكون لعبه من مامتك مثلا

  7. أحمد
    03/04/2011 at 08:47

    بسم الله .طبعا الموضوع صعب جدا لكن استعيني بالله وحاولي تتصرفي بحكمة وبدون تهور . وما تزعليش مني لازم انت الأول تصلحي من نفسك عشان ما تشعريش انك بتأمري والدتك بالبر وناسية نفسك .ث شخص إن أمر إبلاغ الوالد أو إدخال شخض آخر يرجع لتقديرك لشخصية اللي قدامك وحكمته في التصرف . وجذلك جدوى التدخل ورد فعل الوالدة .أما الاتصال بهذا الشخص أو الذهاب اليه فكلام غير منطقي غالبا هيعرضك لمخاطر

  8. الحاجة فاطمة وخبرة السنين
    03/04/2011 at 02:38

    اسمعي حبيبتي اولا انا مش عاوزاكي تكرهي امك ابدا بالعكس اعتبريها في ازمة وانتي عاوزة تنقظيها وبلاش تقسي عليها لانها في الاول والاخر امك ومش هتغيريها يعني هتفضل امك لكن نصيحتي ليكي اتكلي على الله وماتخافيش ربنا هيقف معاكي اولا اشركي حد من اخواتك تثقي فيه علشان يساعدك على امك وماتخافيش من انها تقول لابوكي على الولد اللي اتعرفتي عليه انتي قولتلها ولو شافت ان ده غلط توجهك ويكفي انك صريحة يعني خليكي قوية والموضوع ده مش هيأثر
    لكن اقعدي معاها انتي واخوكي واتكلمي معاها بحزم جامد وحاولي تفهميها انها بكده هتخسركم للابد واو كانت عاوزة تكمل تكمل بعيد عنكم وانك هقولي لبابا لانك بتعتبري دي خيانه يعني لازم مامتك تعرف ان المشكله هتكبر وانها هتخسر كل شئ بسبب الراجل المؤذي ده فهمتي يعني خليكي قاسية شوية وخاصميها اسبوع مثلا لو مارجعتش عن الموضوع ده اضغطي عليها لكن طبعا ده من ورا قلبك واوعي يابنتي تقولي لباباكي معلش واعذري ماما يمكن الشيطان ده اثر عليها جامد معلش لكن بردوا هما في الاول ربنا يستر وخلي اخوكي يكلم الراجل دهاو يخلي واحد يكلمه اكبر منه ويهدده انه لو مابعدتش عن امكم هتعملوله مشاكل كبيره هو مش قدها يمكن يبعد عن المشاكل وقولي لماما ربنا عمره ماهيرضى ابدا بالخيانه لانكدا بدأتيها ولو انتي ياماما هتفضلي الراجل ده علينا خلاص انا هقول لبابا وانفصلوا عن بعض لان مقبلش انك تخوني بابا او تعيشي معاه بالعافية طبعا يا حبيبتي كل دي تهديدات وبس لحد ماتحس ان الكلام ده بجد وتخاف على اسرتها وترجع فهمتي لكن لازم تكوني قوية وبلاش تسرعي وتقولي لبابا يمكن تتوب وتراجع نفسها وربنا يهديها لكن معلش خدي منها موقف صارم انتي واخوكي لانقا1 امك من الشيطان ده الله يخرب بيته ويبعد عنها منه لله
    اتمنى ان كل راجل بيخون مراته يقرأ رسالتك ويحس انه ممكن يهد بيت ويزرع الشك وان ربك لبرمصاد وربنا يهديها وينتقم من الراجل ده وطمنينا عليكي يا حبيبتي وادعي ربنا يهديها اللهم امين

  9. الحمد الى الله
    02/04/2011 at 01:30

    الحمد الى الله الذي جعلنا مسلمين اين اسلام عندكم اين طاعة الله هل امور الدنيا تشغلنا عن عبادة الله انا لا اقدر اجاوب اكثر من هذا الجواب الله يستر على جميع امة المسلمين

  10. Tiger
    31/03/2011 at 14:00

    عن جد الله يكون معاك
    بس لو إتطور الأمر ممكن تكلمي أبووك
    حتى لو كانت هناك خناقة أحسن بعدين من الخيانة ويبقى طلاق وفضايح

  11. مسلمه
    29/03/2011 at 20:49

    مش متخيله ان انت اختي بالك وابوكي لا اسالي امك واحرجيها وهدديها كمان انك تقولي لابوكي وابوكي ده فين مفيش حاجه اسمها طيب يا حرم هو مفروض يكون اكثر واحد حاسس بيهاوبتصرفاتها

  12. حلم
    28/03/2011 at 16:38

    ربنا يبعد عنكو الشر بس مدام شاغل امك كده فالاحست تقوليلها مينفعش ياماما عشان اخواتى وبابا ويارب يجعل فى قلبها الرحمة وتبعد عنه عشان ده خراب بيوت

  13. سما الدنيا
    28/03/2011 at 16:31

    شوفى الانسان ده لازم تبعدى امك عنه مدام شغالها كده احسن البيت يتخرب فالاحسن تصارحيه وتكلميها ويارب يهدى الحال

  14. سما الدنيا
    28/03/2011 at 16:29

    ال(شوفى الانسان ده لو بيكلمها على خياتة فحسب الله ونعم الوكيل ومن رائيى تكلمى امك نفسها عشان والدك لو عرف البيت هيتخرب وحرام انتى اكتر واحدة هتكونى مش راضية بكدا فصارحيها وعرفيها انه مينعش عشان احنا ياما شكلنا وبيتنا واخواتى ويارب يهدى ويبعد عنها الشر

  15. صلو على نبينا محمد (مسلمه
    28/03/2011 at 16:02

    مش عارفه اقولك ايه لكن انتى بتقولى ان عندك اخوات ثانيه فى سنك لو عندك اخت فى سنك احكيلها وخليها تكلم مامتك على اساس انها لاحظت لانك بتقولى انها بتهددك انتى كمان بعلاقتك مع شخص يبقى الحل تحكى لاخواتك البنات وبلاش تدخلى الذكور فى الموضوع واتفقوا على انكم تكلموا والدتكم بكل صراحه وتوضعوا حل للموضوع ده معاه واخواتك يقولوا لها انها لو كلمت الرجل ده ثانى هيخبروا والدهم بصراحه انا شايفه ان ده من الواجب عليكم تجاه والدكم الغلبان اللى مش حاسس بحاجه وزوجتها جايبه كرامته الارض وكمان كرامتكم اتفقى انتى واخواتك وواجهوها وحسسوها انكم مش راضين وده شىء يمس سمعتكم وسمعه ابوكم

  16. المجهول
    28/03/2011 at 12:37

    اختى العزيزة بصى الحل الوحيد تقربى منها وتعرفى وتخليها تحكيلك كل شىء وواحده واحده تبينى ليها انو الراجل ده مثلا بيتسلى لو امى هعمل كدا وبدون كسوف لازم نبقى ازكى من كدا اية العيب انى امك كلمت حد العيب انك متفهميش دماغها ومتقربيش بينها هيا و باباكى
    ما هو من الزكاء اننا نقابل اى كارثة بلعقل هيا شكلة لقت شىء مع الراجل ده مش لاقية معاكم
    المحدش يفهمو انى الام بطبعها لو هيا حاسة انى عيالها بيحبوها هتفضل لعيالها وبس ولو جوزها بيحبها هتحبو انما لو مشغول عنها يا جماعه مش هنعيش غير مرة فا العيب انك انتى نفسك متتعرفيش على الراجل ده اعرفى عوز اية ووصلى لامك الصورة اصلى البيحب حد بيبقى زى العبيط مش بيشوف عيوبة والله العقل سيد كل شىء براحة كل شىء يتحل باذن الله – بلعقل كدا عرفت انى امى بتحب واحد وبتكلمو على طول مفهاش مانع لما اقعد اقولها اية يا حبيبت قلبى شكلك بتحبى الايام دى وواقعه لشوشتك طيب والراجل ابوية ده نعمل فى اية نموتو ولا نخلعو الكلام لية اسلوبو مهما كان امك فى الاخر ولا فى الاول هتتبرى منها يعنى طبعا لا بس الحب البينك وبينها يحل كل شىء انما لو مفيش حب بينك وبينها خلاص انسى اى كلام من الانا قولتو وسبيها على الله

  17. etqan54
    28/03/2011 at 10:08

    ابنتى الغالية اخشى ان تكونى متوهمة الموضوع من اساسه وان كنت متأكدة حاولى تلفتى نظر والدك ان يهتم بأمك شوية من جميع النواحى اكيد هو مسالم جداااااااااا من كل ا لنواحى لان امك اكيد تشعر بفراغ وسببه الرئيسى السيد الوالد اما لعدم التوافق بينهما او لجهل بأمور الحياة او عدم اهتمام اظن والدك يتحمل كثير من اسباب المشكلة

  18. بنوته مصريه
    27/03/2011 at 22:52

    علي فكره ياحبيبتي اوعي ترتكبي الخطا ده وتقولي لباباكي باي شكل لانك كده هتهدمي كيان اسرتكم وشيلي الحل ده من دماغك وعيزاكي تعرفي حاجه وهي ان مامتك طالما وقعت في الهباب ده اللي بيقولوا عليه العشق اعرفي ان هي ممكن تبيع اي حاجه في سبيله بمعني اصح ممكن تبيعك انتي واخواتك فياريت تحاولي تدعي ربنا انه يهديها ليكم ويضللها عن هذا الرجل وياريت تقربي من ربنا واعرفي ان ربنا ان شاء الله مش هيخزلك وحاولي تروحي للراجل ده لو انتي عرفاه شخصيا وكلميه بكل ادب وذوق واشرحيله حالتكم في حالة تفكك الاسره بسببه وباذن الله ربنا هيحنن قلبه عليكي انتي واخواتك وربنا يصلح حال مامتك ويهديها

  19. حل واحد
    27/03/2011 at 21:37

    نصيحتى ليكى بس بأمانه اشترى خط تليفون جديد واطلبى باباكى أو ابعتيله رساله من الرقم الجديد وعرفيه إن زوجته بتكلم رجاله وخصوصا رقم الراجل وكلام مش فى الشغل وبكده ابوكى هايحب يتأكد واقل حاجه ممكن يضغط عليها وانتى هاتكونى بعيد عن الموضوع او حل تانى قولى لأبوكى عندك حلين

  20. امير الغرام المصرى
    27/03/2011 at 19:54

    بسم الله والصلاة والسلام على رسول الله سيدنا محمد وعلى اله وصحبه وسلم تسليما كثيرا
    من وجهت نظرى المتواضعه اختى ان تقومى بمناقشة امك بهذا الموضوع وبالكلام الغير مباشر مثلا تقوليها عندى واحده صحبتى بتعمل كذا وكذا وتحكيلها وهيه بتسالنى اعمل ايه فى المشكله دى ومش عارفه اقولها ايه ممكن تقوليلى حل يا ماما
    يعنى بذكاء وفى نفس الوقت تكونى لبقه فى الحوار مع والدتك ولا تتعدى حدود الاحترام مع والدتك
    وتقوليها انا خايفه عليها جدا لانها اعز اصدقائى فى الدنيا ولو ده حصل لبنتها هل هتوافق على ده ولو حطت نفسها مكان بنتها وبتها فى مكانها ايه الوضع الى هيكون يعنى الذكاء فى الحوار
    وبعد كده تحاولى متسيبهاش لوحدها وتشغليها ديما باى حاجه وقربى من والدتك وذكريها بالله وشغلى قران فى البيت وخطب ووفقى الله وابدئى من الان وحاولى تقعدى ع بباكى وتقوليله انا شيفاك مش واخد بالك من ماما ولا مهتم بيها دى ماما بتكلمنى عنك دايما وبتحكيلى عن حبها ليك وتعلقها بيك ونفسى ربنا يكرمنى براجل زيك يا بابا واحبه زى مماما بتحبك وبتكلمنى عن حنيتك طبعا هتقولو كلكو طيب ما بابا هيسال ماما اه سعتها هيه هتفهم لوحدها وفى نفس الوقت لو عتبتها هتقول ليها انا بشكر لبابا فيكى وربنا يهدى

اترك رداً أو حلاً لهذه المشكلة