انا مش عارفة اللى عملته ده صح ولا غلط …..هاقول على المشكلة انا رنيت على رقم غريب بالغلط وبعدين اللى رنيت عليه كلمنى وقولتله انى طلبت الرقم غلط واعتذرتله لكن هو اصر انه يكلمنى وانا مكنتش راضية اكلمه وقولتله خلاص انا رنيت غلط وخلاص لكن هو هكلمك تانى وقالى انه بيحب يتعرف على الناس وعرفت منه اسمه وطلع كمان من نفس الدين وكان بيقفل معايا وهو مش فاضى ويكلمنى لما يفضى ويحكى عن نفسه وشغله بس انا مرضتيش اقوله اسمى الحقيقى .
بس طلع من بلد وانا من بلد تانية بعيد لكن طبيعة شغله بيسافر على كل محافظات الجمهورية وانه هيجى بلدى قريب وعايز يشوفنى .
احنا اتكلمنا حوالى اربع او خمس مرات وفى مرة بنحكى مع بعض عرفت منه انه جى المنطقة اللى انا ساكنة فيها وكمان نفس الشارع اللى انا فيه بعدين عرفت منه انه يعرف جوز اختى ولما عرف هو الموضوع ده زعل خالص علشان جوز اختى صاحبه واتكسف وقالى انا اسف وقفل معايا.
بس انا اتعلقت بيه خالص وارتحت للكلام معاه خالص وخايفة اكون حبيته وكمان انا مكسوفة من نفسى خالص علشان انا اول مرة اعمل كده مع حد وانا كنت رافضة الكلام معاه فى الاول بس هو فعلا طلع شخص كويس .انا مش عارفة اعمل ايه
أختي الكريمة
ده سوء تقدير منك وضعف في الحكم على الأخرين لضعف الخبرة عندك
وبعدين لما عرف إن في حد صاحبه يعرفك اعتذر وبعد عنك،،، ليه لأنه كان بيتسلى بس مش أكتر…
إزاي يكلم واحدة مش عارفها ويقولها قابليني ويبقى محترم….
البنات دول على نياتهم والله أي حد يقدر يضحك على 90% منهم بشوية كلام فاضي… ربنا يحفظكوا من شر الحقارى الأوغاد من كل شر…. سيبك منه وكام يوم والموضوع هيتنسى بالنسبة ليكي نهائي كأن لم يكن..
بصى يااختى اولا هو كلمك وانتى مش كنتى راضيه معنى ذلك انه مش كويس وبكلم اى رقم او اى حد وهو لو بيحبك بجد كان دخل البيت من بابه وخصوصا اول ما عرفتى انه هو يعرفك ويعرف حد من اهلك ونصيحه من اخت الى اختها سبيه ومتكلمهوش تانى لانه وبختصار مش محترم خالص واحسلك تحاولى تتقربى الى الله وتقرئ قران كتير وربنا معاكى
مش تزعلى من اللى هقولهولك مفيش ولد بيعرف بنت ع التلفون وبيبقى فى نيته خير ودا بيسافر كتير من كلامك عنه انه بيحب يعرف بنات من جميع المناطق اللى بيسافرها علشان يتسلى هو لو كان بيحبك بجد كان كلم اهلك
كلمتين ونص هو لو اتعلق بيكي وحبك فعلا كان من المفروض انة يتقدم رسمي ولو دة ماحصلش يبقى كان عايز يتسلى .وسواء اتقدم اوالموضوع خلص في الحالتين انتي الكسبانة. ولا اية.
مع احترامي وتحياتي.
اول حاجة هذة غلطتك انك سمحتي لواحد يكلمك وانت متعرفيهوش
والحمد للة جات على كدة
حاولي اشغال نفسك بالطاعات او اشغلي نفسك بالدراسة اذا كنتي طالبة او باعمال يدوي كالخياطة اوالرسم — الخ
واذا لك نفس تتجوزي ولسة ربنا ما اراد حاولي ان تخبري صديقة اوقريبة لك بذلك وهم سوف يساعدوك بايجاد عريس لك —
ابتعدي عن الشبهات لآن اغلب الشباب هذة الأيام ذئاب بشرية عندما يأخذ حاجتة منك سوف يرميك او يبتزك بجميع الطرق – ماليا – جنسيا——– الخ
انتبهي على نفسك واصبري واتقي الله
فأن الله سيعوضك الخير الكثير ان شاء الله
قال تعالى= ان بعد العسر يسرا
بصي ياحبيبتي هو من اخر مرة اتكلمتو مع بعض رجع كلمك تاني؟؟ عموما انا حقولك لو مكلمكيش مرة تانية يبقى انتي مش فارقة معاه ومكنش جدي من اساسو.وبعد ماعرف ان صحبو يبقى جوز اختك اكيد حيتكسف لانو بيعمل حاجة مش صح ومش بعيد قبل ميعرف كان بيحكي لصحبو اللي هو جوز اختك عن نزواتو وبيقولو عرفت وحدة علتليفون والكلام دا.هو لو كان مهتم بجد مكانش اتخلى عنك.وانتي شكلك صغيرة والاهتمام الادهولك في الفترة اللي كان بيكلمك فيها هو اللي خلاك تحسي انك بتحبه بس صدقيني دا مش حب ودا موقف حصلك وتجربة تستفيدي منها عشان تتعلمي انسيه يللا بلاش توجعي دماغك وكل سنة وانتي طيبة
دا اسمة تعلق بس مش حب او ارتباط معنى كده انه في فراغ ف حياتك كبير ……لازم تعلرفي ان اي شب بيبقى عايز يتعرف ع بنت واتنين وتلاته ويكلمهم ويحس معاهم بعواطف علشان بردك الحرمان والفراغ ودي شهوه طبيعيه المهم ان الانسان ما يسبش نفسة للاهواء لانه بتضيعه لان الانسان لما بيعمل غلط بيتعلق بالغلط دا والغلط بيكبر هوا بيتسلى وطبعا مش ممكن يقلك وبعدين انتي مخطوبه ولا انسه ماتخطبتيش ولا ايه ….هو لما عرف انك تبع حد يعرفه زعل لانه كان نفسه الموضوع يبقى ف الضلمه مش ف النور لما حس انه هيبقى ف النور زعل