السلام عليكم ورحمة الله وبركاته
انا شابه عمرى 28 سنه بشتغل فى مركز مرموق ورومانسية جدا جدا وحساسة جدا فوق ما تتخيلو
كنت فى الجامعة اول ما دخلت حاولت ان ابحث عن حب زى مابشوف فى الافلام ولكنى وجدت بعد اول سنه انى ظروفى المادية صعبة واحنا من عيلة فقيرة الحمد لله فقررت ان اركز فى دراستى واقفلى على قلبى وهذا غصبن عنى حتى لا يضيعنى الحب واضيع مستقبلى وكنت لا اهتم بنفسى ولا اجد المال لكى اهتم بنفسى مثل باقى البنات زملائى وفعلا تفوقت واشتغلت فى مركز مرموق
وبعد تخرجى بدات احاول ابحث عن شخص يحبنى ويكون رومانسى ولكنى لا اجد من يهتم بى ويعجب بى ولكن بعد سنتين من تخرجى اشتغلت فى مكتب خاص وبدات اتعرف على زملائى ووجدت فيهم من يعجب بى من غير كلام وانا كنت مبسوطة افتكرت انى لاقيت الشخص اللى كنت بدور علية ولكنى بعد 3 اشهر من الاعجاب المتبادل من غير كلام فققرت ان افتح مع زميلى الموضوع وهو قالى ان فى واحدة فى باله وعاوز يرتبط بها رسمى ولكنى احسست اننا غير متوافقين بعد كلامى معاه وقولت خلاص هنهى الموضوع ولكنه حاول مرة اخرى وطلب مقابلتى وفعلا وافقت ولكنى قابلته فى مكان ثقافى لانها اول مرة اخرج مع شاب وحبيت انى معملش حاجة تغضب ربنا وانى اخرج معاه فى الكافيهات ولكنه صدمنى بانه لا يستطيع الارتباط بى لانه كان يحب زميلته فى الجامعة وكنت ساعتها صليت استخارة وبعد ما مشيت كنت راضية وهو حاول يكلمنى ويقولى ادينى فرصة فرفضت وبدات اقابله فى الشغل وحاول يكلمنى اكثر من مرة ولكن بعدت وبعد فترة عرفت انه رجع لحبيبته الاولى وكانت نفسيتى تعبانه ومش لاقية حد اشتكيلة وبعدين سابته فحاول يرجعلى من خلال تظرات ليس اكثر وبعد فترة حاولت اتكلم معاه وقالى انه هيخطب وانه لو كان عاوزنى كان هيخدنى بس هو مش عاوزنى تعبت نفسيا وانا على الحال ده بقالى 3 سنين بشوفه كل يوم فى الشغل وساعات خطيبته كانت بتيجى الشغل وانا مش عارفة اوصفلكم مدى تعبى ولكن لا ابين ولكن الاصعب انى كل يوم دمعتى على خدى على الحال ده بقالى 3 سنين
وربنا كرمنى بعد ذلك بدات احاول انسى بالتدريج وخصوصا لما جيه فى المكتب زميل اخر كان معايا فى الكلية وكنت اعرفة بدا يشتغل معانا بدانا نقرب لبعض وهو اصغر من ب 3 سنين وبعد سنه الولد ده سافر يشتغل بره واقعد سنتين خلال السنتين كنت بكلمله ويكلمنى على النت وكان بيبدى اعجابه بيه ورجع الشاب مصر وعزمنى على الفطار ولكنى احسست بنظرات غريبة منه ليا فحسيت كانه بيقولى انتى بتخرجى معايا ليه ونظرات انا حساها مريبة وبعد فترة وجدت ان هذا الشاب مش ناوى يخطبنى وبيقولى هيخطب السنه اللى جاية
فانا قررت ابعد عنه علشان هو حسيت انه كان بيتسلى فيا فى الغربة ولما جيه حسيت انه اتغير وقولت شكله مش هيخطبنى بس المشكلة انى كبرت فى السن ونفسى اتجوز زى بقيت زميلى ونفسى اكلمه تانى بس انا عندى كرامة ومش عايزة اتزلل لحد
يا ريت يا جماعة افيدونى اكلمه علشان اتجوز ولا لا واحافظ على كرامتى وخصوصا انى قسيت كثير فى حياتى ارجوكم محتاجة الرد لانه ده هيرحنى
وجزاكم الله عنى خيرا
الزواج وسيلة وليس غاية
شروط اختيار الزوج السليمة بالنسبة للرجل فيجب أن يكون على خلق ودين لحديث رسول الله صلى الله عليه وسلم “إذا جاءكم من ترضون دينه فزوجوه إن لم تفعلوا تكن فتنة في الأرض وفساد كبير” والمقصود بالدين هو المعاملة والخلق الحسن وصدق النية والكرم وليس الشكل من ثوب قصير أو لحية لأن الدين المعاملة كما قال رسول الله صلى الله عليه وسلم فالإنسان لا يغتر بالشكل وكذلك القدرة على المعاشرة الزوجية والانفاق على الأسرة والشخصية العاقلة الرشيدة وأنه أهلاً للزواج حتى يستطيع أن يقود سفينة الحياة وبذلك تصل إلى شاطئ الآمان إن شاء الله وأن يكون الهدف من الزواج قائم على أساس من المودة والرحمة والحفاظ على النسل وتربية أطفال قادرين فيما بعد على تحمل المسئولية.
الي الاخت الفاضلة صاحبةا لشكوي – ملايين الشباب وملايين البنات – يخطب الشاب البنت ويعقد عليها ويحددوا موعدا للزفاف ويقوموا بترتيبات الفرح – وعلي أهون سبب تتفك الخطوبة ويطلق الشاب الفتاه بعد سنوات من التعارف والارتباط – وعلي العكس لأهون الاسباب يتم التعرف والارتباط بكل التيسيرات والارتياح – خلاصة القول الزوج والزوجة لبعض قبل ولادتهم مكتوب عند ربنا والزواج مثله مثل الرزق والموت ان هربت منه هو يبحث عنك – صدقيني مش شرط يكون الزملاء من داخل عمللك قد يكون العريس يراكي في الطريق ويعجب بكي ويتقدم للارتباط بكي – متعرفيش الخير فين – تقربي الي الله – لا اله الا الله وحده لا شريك له – له الملك وله الحمد يحيي ويميت وهو حي لا يموت بيدها لخير وهو ارحم الراحمين – اتركي الموضوع لربنا وتقربي الي الله سبحانه وتعالي بالصلاه وقراءة القرأن والاستغفار – واللهس بحانه وتعالي يتنزل الي الارض بما يليق بجلاله سبحانه وتعالي في الثلث الأخير من الليل ويقول : هل من تائب فاتوب عليه ؟ – هل من مستغفر فاغفر له ؟ – هل من صاحب حاجة فاعطيه ؟ – اختي الفاضلة اسئلي الله وحده واشكي له همك واطلبي منه طلبك وهو القادر سبحانه وتعالي ولا يعجزه شيء في السماء ولا في الارض – سبحانه وتعالي اذا اراد شيئا فانه يقول للشيء كن فيكون – فامره سبحانه وتعالي بين الكاف والنون – تضرعي الي الله فانه سبحانه وتعالي قادر مقتدر لا يعجزه شيء في الارض ولا في السماء
الكلام اللى عملتيه صح يا اختى ابعدي عن اي شخص يفكر اللعب بيكى انتى بتى ادمه وربنا وضع فينا المشاعر والاحساس والكرامه لذلك لكن مش معناه انك تبعدي عن الناس بسبب واحد زي ده لا اكيد هتبقى شخص هيكون هو المطلوب بالصبر والصلاه والدعاء ان شاء الله هيكون نصيبك ميسور الحال ورربنا هيتتم على خير اهم حاجه الصبر والصلاه والدعاء وحسن معامله الناس وطريقه الكلام الجميله العفيفه وشكرا اختى
الله معكى اختى لو انتى كنتى بتحبيه وعايزاه صح كنتى على الاقل كلمتى اى بنت من اصحابك فى الشغل وهى تلمح ليه علشان كرامتك ثانيا حاولى من تغير نفسك الفقر عمره ما كان عيب اهم حاجه شخصيه البنى ادم
اختى في الله السلام عليكم ورحمة الله وبركاته….
انصحك يااختى ان تلتزمى بالدعاء والصلاة والتقرب من الله وعليكى بدعاء تيسير الزواج وكمان تقومى الليل تصلي ركعتين قضاء حاجة وتدعى فيهم وان شاء الله دعوتك مستجابه واكثري من الاستغفار وفي دعاء جميل اوى ياريت كل البنات والشباب تدعى بيه (اللهم انى لما انزلت اليا من خير فقير) واعرفي يااختى ان نصيبك هيجى هيجى لحد عندك دى الارزاق ربنا مقسمها ومفيش حد بياخد نصيب حد وكله بأوان ربنا وبمعاد يعلمة الله واسأل الله ان يرزقك الزوج الصالح والزريه الصالحة انتى وجميع بنات المسلمين ويرزق الشباب بالزوجات الصالحات اميييييييين يارب العالمين
آآآآآآآآآآآآآآآآآآآه ياأختي في الله،والله ضغطت على الجرح العميق، فانت احمدي ربنا أنو عمرك 28 وحاصلة على شغل مرموق، أمال أنا أقول إيه اللي أصبح عمري 37 سنة دون جواز وماعنديش شغل مرموق زيك، بس كلما ضاقت بي الدنيا أستغفر ربي وأحمده، وعسى أن تكرهو شيئا وهو خير لكم، وأقول أكيد في حكمة من كده ولازم ربنا مخبيلي الخير إن شاء الله ليا ولجميع المسلمين.
يارب صبرنا واطعمنا ولا تحرمنا من نعمتك ورزقك.
ازاى تجوزى واحد زى دة انتى كرامتك اهم حاجة ياما قبلى الخطوبة كدة امال بعد الجواز هيبقى ازاى
السلام عليكم ورحمة الله وبركاته..انا حاسة بيكى اوى بس خليكى واثقة ان امر الله نافذ..ولو نصيبك هيجيلك من غير ما تحسى انك ذليتى نفسك لا سمح الله…ولو مش نصيبك لو عملتى ايه برده مش هتاخديه ..طيب يبقى ايه الحل؟؟؟ طريق الله ..مالناش غيره …ادعى واستغفرى وصلى على قد ماتقدرى ..ربنا كبير واللى عنده كتير..سبحانه لا يعجزه شىءفى الارض ولا فى السماء..انما امره إذا أراد شيئأ أن يقول له كن فيكون …خليكى مع ربنا ..وبإذن الله هيرزقك اكتر من توقعاتك ..يارب يفك كربك عاجلا يارب انتى وكل بنات المسلمين
حبيبتي قصتك وجعتني بقلبي من جوا لأني انا كمان عمري 29 سنة وباقي عليا كم شهر وادخل 30 ولسا ما اتجوزت .. بس عزاكي تقولي حاجه مهمة جداً…
قولي الحمد لله .. يمكن انك تظني ان الحريم المتجوزات فرحانات مع عيالهم واجوازهم بس انا حقولها لك بصراحه اكتشفت انهم هم اللي حسدنا لأنهم نفسهم يعيشوا حياتهم من غير قيود لاجوز ولا عيال والوحده منهم تحس انو ما عندهاش ضمانات لحياتها خصوصا لو معندهاش تعليم او شهادة تنفعها ومضطره تصبر على جوزها حتى لو كان بعملها معاملة وحشه..
وفي اللي مرتاحه وجوزها بينفذ كل طلبتها بس برضو بتحسدك لأنه حاسه انها مخنوقه ومقيده وشايلة مسؤليات..
اما انت بتنام على مخدتك ولا تفكري في قومة الصبح والطبيخ و الغسيل والكوي والتنظيف كل يوم .. فلا تشغلي نفسك بحاجه دي مش بأيدك دا رزق من عند ربنا .. وانا حاسه بيكي..
يا ما حسيت بضيقه وتمنيت لو حد ياخدني بحضنه او حتى اشكي له اللي انا حاسه بيه.. وياما شليت عيال بأديا وقلبي مقطع يقول متى حشوف عيالي واتهنى بيهم..
بس الحزن دا ما جبش غير المرض والهم والحزن لو ربنا كتب لي حاجه انا حشوفها وهي اللي حتجيني لغاية عندي.. وبرضو الواحد يعمل بالأسباب ..
في بنات كتير بكلمو خاطبه والخطاب يدخلوا ويرجو من عندهم وبنات كتير يتكسر قلبها لأنها بتحس انها ما عندهاش ولا حاجه وانها خسرت كل حاجه.. وانتي ربنا انعم عليكي بتعليمك وشغلك فقولي الحمد لله …
وانا عندي عمة بابا اتجوزت وعمرها اربعين سنة وجابت بنتين وتصدقي انها مبسوطه ومرتاحه اوي بحياتها وصحتها كويسه و جدتي اللي اتجوزت صغيرة وجابت دست عيال حالتها مدهورة كل واحد له مشاكل من جهة وهي صحتها ضعفت اوي من كتر الخلفه لو تشوفي حالتهم الأتنين مع ان عمة بابا اكبر من جدتي بعشر سنين بس باين عليها صغيره وتحب تشجع فريق الأهلي وعايشه حياتها مبسوطه وعلى فكره الراجل اللي اتجوزتو عمة بابا كان ارمل وعندو ولد وبنتين وربتهم كلهم زي عيالها والولد لعب بفريق الأهلي وجاب فلوس كتيره وبنالهم احلى فيلا قريبه على الساحل وكلهم بيحبوا عمتي وبيبوسوا تراب رجلها قد ما كانت طيبه وحنينه معاهم..
شفتي الزاي ومين يدري لو كان لك ولد او اتنين منتيش عارفه لو بيبروا بيكي لو كبرتي وعجزتي ولا لاء …
بالنسبة لزميلك فالمرة تزيد قميتها لوكانت صعبة ولو كنتي دالقة نفسك حتصغري في عينو وبيشوف وحده تانيه اكيد .. ارفعي راسك وامشي من جنبوا ولا كأنه موجود ولو عازيك حيعرف عنوان بيتك وحجيلك ولو حيعزمك بعد كده ارفضي وقولي معنديش وقت لضايع الوقت دا انا اسفه شفلك حد تاني يسمعلك او تخرج معاه..
عازاكي تعرفي حاجه وحده وهي … ان ربنا بيحبك وعايز لك الخير حتى لو جا متأخر فهو خير لك ان شاء الله .. اوعي تيأسي من رحمة ربنا..
شوفى يا اختى اولا متكلميش حد لان كرامتك المفروض تكون رقم واحد وتقدرى تقنعى نفسك بدا اذا قلتى لنفسك انك حتى لو كلمتيه دا مش هينفع … انا عارف ان الموضوع صعب لانك حاسة انك بداتى تكبرى لكن لا تيئسى من رحمة الله ربنا يحب الالحاح فالدعاء ادعى ربنا كتير ومتندميش لانك عملتى استخارة قبل كدا ومنفعش واهم شى الاستغفار الكتير لان الاستغفار بيفتح ابواب الرزق و ربنا يرزقك بالزوج الصالح والذرية الصالحة باذن الله …
الأخت العزيزة….أنت مش لوحدك في المشكلة ده و بسطي الأمور اكتر و بعدين دلوقت اترفع سن الزواج…. أنا عندي زملاء لسه متجوزوش و عندهم 30 سنة….
الصبر و التروي لحد ما يجيلك الشخص المناسب و لا تنجرفي وراء احد و لا تستعجلي فكرة الزواج….فحالات الطلاق مرتفعة جدا بسبب عدم الإتفاق و الاسباب الاخري…و نصيحتي سيبك من الأشخاص اللي مش جادين…. بيبانوا بسرعة…يمكنك توسيع دائرة أصدقائك و معارفك و ستجدي ان شاء الله زوجا صالحا
السلام عليكم ورحمة الله وبركاتة
انا انصحك نصيحة اخوية وياريت تعملى بيها
اولا عليكى الا تتنزلى عن كرماتك وكبريائك واخلاقك وادبك لانك لو فتحتية فى موضوع الزواج ورفض انتى حتندمى وحيبع ويشترى فيكى انتى قدامة لو عاوز يرتبط بيكى اكيد مش حيتردد
ثانيا ودة المهم — عليكى فى اقرب وقت ممكن وياريت انهردة تقومى من النوم فى الثلث الاخير من الليل وتصلى ركتين حاجة وتدى ربنا سبحانة وتعالى بأنة يرزقك ابن الحلال ويكون عندك يقين بالله ان بعد صلاتك لركتين الحاجة لله ان الله سبحاتنة وتعالى سيرزقك بالزوج المناسب
لان الله سبحانة وتعالى بينزل فى الثلث الاخير من الليل ويقول هل من دعاعى استجيب الية
لو الزواج ينزل من كرامتك يبقى ابقي على حالك احسن لان لو راحت كرامتك مش رح تقدري تعوضيها ابدا وانا شايفة ان حكايتك مش قصة حب يعني حتى تتساهلي في كرامتك بسببها يعني لو كان حب حقيقي وقصة حب يعني كنت اقولك الحب لا يعرف المستحيل لكن انتي احتياجك للاهتمام وللحب هو يلي خلاكي تكوني عرضة لهيك مواقف ..حبي نفسك اكثر وامئي قلبك بــحب الله وقتها رح تشوفي كل شي تافه ولو الله رايدلك الخير فيهم كان خطبوكي وطبعا مش ممكن ترضي تتزوجي واحد يحب غيرك لهيك لازم تتحلي بالصبر ولو حتى صار عمرك 40 لما يكون الله راضي عنك رح يعوضك كل خير لو مش في الدنيا في لااخرة باذن الله ولكي مني كل الدعوات الله يرزقك الزوج الصالح ان شاء الله الي يعوضك كل خير والسلام عليكم ورحمة الله تعالى وبركاته
صبرا أختى الزواج رزق وسيأتى في الموعد الذى حدده الله — اللهم ارزق بنات المسلمين أزواجا صالحين يا رب