مشاكل صحية

التخلص من رائحة الفم الكريهة..محتاج مساعدتكم فلا تخذلونى

بسم الله الرحمن الرحيم مشكلتى ببساطة هى أنى دائما بجد أن رائحة فمى كريهة على الرغم أنى حاولت بكل الطرق التخلص منها ولكن سريعا ماكانت تظهر من جديد فاستخدمت معجون اسنان ومطهر للفم ممكن يقول البعض ان الموضوع عادى جدا أو تافه لكن المهم أن ده بيضايقنى لأن دائما بذهب للمسجد بشكل يومى ودائم للصلاة فبكون مرعوب من اللى بيصلى جانبى متأزى من رائحة فمى وساعات بكسل الذهاب للجامع وبصلى فى البيت بجد أتمنى أنى أجد الحل من أى شخص وياريت ماحدش يهزر أو يستخف دمه من فضلكم أثابكم الله بالخير والجزاء على كلمة مفيدة وصادقة والسلاموا عليكم ورحمة الله وبركاته

مشاكل وحلول ذات صلة

اضيف بتاريخ: Sunday, December 12th, 2010 في 17:04

كلمات مشاكل وحلول: , , , ,

15 رد to “التخلص من رائحة الفم الكريهة..محتاج مساعدتكم فلا تخذلونى”

  1. ندمانة جدااااااااا
    20/05/2011 at 08:58

    انت لازم تروح لدكتور اسنان ومختص فى الحاجات دي

  2. رومانسى
    09/01/2011 at 00:23

    اخى ممكن تكشف على اللوز عندك ممكن يكون بها التهاب هو ذلك سبب رائحة الفم

  3. نورا محمد
    19/12/2010 at 10:55

    عليك الاعتناء باسنانك بعد كل وجبة واستخدام المضمضة مباشرا وياريت تستخدم السواك فهو مطهرة للفم مرضاة للرب ممكن تستخدمه قبل كل وضوء لو مفيش نتيجة ممكن تعرض نفسك على دكتور انف واذن وربنا الشافى المعافى

  4. حسن
    14/12/2010 at 21:47

    السلام على من أتبع الهدى
    طريقة كويسة جداً أن شاء الله تكون مفيدة تذهب الى الصيدلية وتشترى مشروب زيت خروع وتخضر حلبة حصة ثم تقوم على الريق تغلى الحلبة وتتركها حتى تكون دافئه ثم تضيف زيت الخروع الزجاجة كلها أو على حسب الكمية المطلوبة ثم تقلب زيت الخروع مع الحلبة ثم تشربهم مرة واحدة أى دفعة واحدة على طول حت لا تتأثر بمرارة زيت الخروع ملحوظة هذة الطريقة تسبب أسهل شديد لذا تقوم بعملية غسيل البطن من فضلات الأكل وتنظف البطن لذا وينصح بها الأطباء عند أى أجراء عملية فى البطن لنظافة البطن وتكون هذة الطريقة أن شاء الله كويسة وتكون نافعة للجميع أن شاء الله

  5. كرم الزناتي
    13/12/2010 at 13:06

    السلام عليكم و رحمة الله و بركاتة
    بخصوص القضاء علي رائحة الفم الكريههة عليك بالاتي
    احضار ثوم + قرنفل + عسل نحل بمقادير متساوية
    بعد ذلك قم بوضعهم في خلاط حتي يمتزجوا تماما
    و عليك بأخذ ملعقة صباحا علي الريق و مساءا قبل النوم
    وسف يتم بمشيئة الله العلاج

  6. الصريح
    13/12/2010 at 09:27

    للتمتع بنفس منعش وثقة برائحة الفم والنفس

    رائحة الفم الكريهة

    الأسباب والعلاج

    رائحة الفم الكريهة أو ما يعرف بـ (بخر الفم) حالة مرضية يهم كل إنسان
    فهي تؤثر على علاقات الفرد الاجتماعية والمهنية، وكثيرا ما فرقت بين الأزواج
    فضلا على أنها تؤرق نسبة كبيرة من الذكور والإناث في كل الأعمار. لا يستطيع احدنا
    أن يكتشف بنفسه ما إذا كان يعاني من بخر الفم، وسبب ذلك عائد إلى ظاهرة تعود
    الأعصاب الشمّية الموجودة بالأنف لرائحتنا.

    الأسباب

    أولاً أسباب متعلقة بالفم

    إهمال نظافة الفم والعناية به

    75% من حالات البخر سببها عدم مراعاة القواعد الصحية الواجب إتباعها في الاعتناء بنظافة الفم والأسنان
    والمفتاح لفهم سوء الرائحة هو مركبات الكبريت الطيارة أو VSC التي تنتج عن تفكيك الأحماض الأمينية
    بفعل نوع من البكتيريا المحللة تتواجد بالفم، ويزيد من سرعة التخمر وجود القلح (الجير)
    وهو تلك الرواسب التي تشبه الجبس حول الأسنان ذات لون اصفر غامق وتكون مليئة بالجراثيم.

    التهابات اللثة

    الالتهاب البسيط في اللثة قد يكون سببا في وجود رائحة نفاذة جدا.

    أطقم الأسنان الصناعية

    فضلات الطعام تصنع من لعاب الفم رواسب مخاطية لزجة تتجمع
    على سطح الأطقم الصناعية وتتخمر بواسطة ميكروبات الفم منتجة رائحة نفاذة جدا.

    بعد العمليات الجراحية للفم

    والسبب في ذلك أن عملية مضغ الطعام العادية تتعطل
    فتكثر الميكروبات في الفم وتقوم بتحليل الدم الذي قد يتسرب أثناء
    العملية مسببة رائحة كريهة نفاذة.

    ثانياً أسباب أخرى

    من أهمها

    التهاب اللوزتين والتهاب الأنف والجيوب الأنفية

    وبعض أمراض الجهاز التنفسي مثل التهاب الشعب الهوائية والتدخين
    وأكل البصل أو الثوم وعسر الهضم وبعض الأمراض مثل مرض السكري والفشل الكبدي أو الكلوي.

    العلاج

    ينحصر العلاج بشكل رئيسي في إزالة المسبب، فإذا كانت الأسباب
    طبية كأمراض الدم والسكر والرئة لابد من معالجة هذه الأمراض.

    أما الرائحة الناجمة عن أسباب فموية فالمعالجة تعطي نتائج فعالة
    ومن خلال الاعتناء بصحة الفم وتنظيف الأسنان بطريقة صحيحة باستخدام السواك أو تفريشها بالفرشاة والمعجون واستخدام الخيط الطبي، وطبيب الأسنان يمكن أن يعالج الأنسجة المريضة والأسنان التالفة ويمكن اللجوء إلى استعمال غسولات فموية ولاسيما تلك الحاوية على عوامل مضادة للجراثيم. فهي تزيل رائحة الفم المزعجة.

    أما عن مضادات البخر فهي كثيرة ومنها المواد المؤكسدة والمواد الماصة كالفحم
    والكلوروفيل والحموض والمواد التي تحرر الكلور.

    وأخيرا لابد أن ننوه إلى أن جفاف الفم سبب مهم للرائحة الكريهة لذلك يفضل الإكثار من تناول الماء
    ومضغ اللبان لأنه ينشط إفراز الغدد اللعابية.

    ويقدم الطب الشعبي العديد من الوصفات العديدة للقضاء على بخر الفم نذكر منها

    يؤخذ من الزعتر مقدار ثلاثين جراما ويغلى في لتر من الماء لمدة ثلاث دقائق ويمضمض به الفم.

    يمضغ البقدونس لمدة ربع ساعة، ويطرح ثم تؤكل تفاحة.

    يؤخذ الثوم والقرنفل بأجزاء متساوية ويعجنان بعسل ويتناوله المصاب على الريق وعند النوم.

    ومن أفضل الطرق أيضا للقضاء على رائحة البصل والثوم تناول ملعقة صغيرة من العسل
    أو مضغ حبة من البن أو أكل تفاحة بعد نصف ساعة من أكل البصل أو الثوم
    فانه يخفف من الرائحة الكريهة.

    مضغ حبات من الهيل

    مضغ ورقات من النعناع الطازج

    تناول حلاوة بولو

    مضغ حبات من القرنفل

  7. الفقير لله
    13/12/2010 at 07:33

    اخي الحبيب انا حصلتلي مثل المشكله ولاكن طلع عندي التهاب في اللثه ونصحوني بالماء والملح مضمضه والحمدلله راحت عني

  8. غفرانك ربى
    13/12/2010 at 04:34

    بص الحل انك تعمل تنضيف للمعده والامعاء
    عشان ممكن يكون فيه بواقى متعفنه وبتسبب الريحه الكريهه
    انت جيب سنامكى وانقعها فى ماء لمده 6 ساعات وبعدين اشربها على الريق
    الماء بالاوراق المنقوعه واستمر اسبوع
    وان شاء الله تمسحى اى شىء

    وكمان بعد الاكل اللحوم او الاسماك او اى شىء
    نظف بين الاسنان باستخدام الخله (السلاكه) عشان اللحم خصوصا بيتعفن ويتحلل
    بين الاسنان
    وقبل النوم اتمضمض بشويه زيت زيتون وبعدين اغسل اسنانك
    وان شاء الله هاتتفاجأ من النتيجه
    ربنا معاك ويوفقك ان شاء الله

  9. المراة القط
    13/12/2010 at 01:40

    السلام عليكم اول شىء لازم تروح لدكتور اسنان لان ممكن رائحة الفم ناتجة عن التهاب بالثة او ممكن يكون بطنك تعبانة وبتاثر على نفسك وفى الحالتين الطبيب هيديك علاج ان شاء الله اما نصيحتى ليك انك تجيب فرشة اسنان جديدة ولما تيجى تغسل سنانك تغسلها من كل الجهات الداخلية والخارجية لحد ما تحس ان فمك نضف وبعد كدة اشرب قرفة بعد الغسيل او كل قرنفل قبل ما تنام والمهم تغسل سنانك الصبح وباليل متكسلش وكل شبت وكثبرة برده بعد الغسيل وياريت تاكل لبان علطول بالنعناع الحار لحد ما تروح الريحة خالص فى نوع لبان حلو جدا اسمة كلورتس فى اى محل بس لو لقيت نتيجة ترد عليا وتقوللى اصل اوصى المحلات متبعش اللبان

  10. (كح كح)شموخ بنت شيوخ
    13/12/2010 at 00:55

    السلام عليكم ورحمة الله وبركاته انا راح اقولك كام حاجة ممكن تعملها عشان تتخلص من رائحة الفم ودي اصلا بتكون ناتجة عن تخمر البكتيريا على اللثة ودي من بوادر التهاب اللثة وممكن رائحة الفم يكون معاها سيلان الدم لما متلا تغسل سنانك او تعض تفاحة او حاجة المهم ممكن تاخد ملعقة صغيره من مسحوق القرفة وتغليه مع كبباية ميه لمدة 3 دقائق وكل يوم الصبح تغسل او بمعنى اصح تمضمض فمك بيها طبعا مع مواضبة الغسل المنتظم للاسنان ولو على الاقل مرتين في اليوم وفيه حل تاني انك كل شوية تمضغ ورقة النعناع دي بتخلي البكتيرة تنحرق بس الحل ده مفعوله مش دائم فانا بنصحك بالقرفة لانها انجح ومجربة نصيحة لست الحامل ممنوع تجرب القرفة نهائيا او تستعمل الطريقة دي وربنا يوفقك

  11. غادة
    12/12/2010 at 23:29

    عايزة اقولك حاجة دى مشكلة كل البشر على وجه الارض مفيش مشكلة منها انت مكبر الموضوع عليك اوى
    استعمل المعجون بعد كل وجبه لان فضلات الطعام المتبقية بتعطى رائحة كريهة وانصحك الافضل والافضل استعمال السواك قبل كل وضوء كما وصتنا السيدة عائشة رضى الله عنها وقول الرسول صلى الله عليه وسلم (لولا ان اشق على امتى لامرتهم بالسواك عند كل صلاة)
    وياريت لو الموضوع بجد كبير اوى زى مابتوصف يبقى عليك باستشارة طبيب لانه ممكن يكون حالة مرضية تعالج
    وشفاك الله وعافاك وازال عنا وعنك اى اذى وبلاء

  12. dr_sasso
    12/12/2010 at 22:36

    ممكن حضرتك تعرض نفسك على دكتور انف و اذن او دكتور باطنة لأن ممكن يكون سبب الرائحة دي حاجة في الجيوب الانفية او كدة وممكن يكون حاجة في الجهاز الهضمي وفي اسباب تانية كتير للموضوع ده
    حضرتك متكسلش وروح لدكتور وهو اللي هيقدر يساعدك في اكتشاف سبب الموضوع وعلاجه

  13. ايمان
    12/12/2010 at 19:54

    حضرتك افضل حاجة تعملها تكشف عند ددكتور سنان
    مممكن حضرتك تكون مش بتهتم بتنظيفا كويس بالمعجون والسواك
    لان رائحة الفم ليها اسباب كتير منها تسوس الاسنان اوالتهاب اللثة او امراض معينة
    فحضرتك عشان تتطمن تذهب لدكتور اسنان وان شاء الله خير واو

  14. شهرزاد
    12/12/2010 at 18:39

    ياريت تستخدم بصفة مستمرة القرنفل فى الفم او وضعه على الاسنان وممكن كمان تستخدم السواك فهو مطهره للفم ومرضاة للرب ويارب اكون افدتك

  15. أبو عمر
    12/12/2010 at 18:34

    السلام عليكم يا اخى الكريم، على فكرة الموضوع ده كان بيأرقنى جدا فبعد بحثى من خلال النت وجد ان اكل البقدونس يساعد على ضياع رائحة الفم الكريمة، كذلك لابد من عرض نفسك على طبيب اسنان لانه اكيد يوجد عندك تسوس وجير وما شابه فى هذه الامور تساعد على رائحة الفم الكريهة كمان اذا كان اى شخص يوجد عنده مشكلة فى البطن او الصدر فمن الجائز وجود رائحة ايضا، فعند سؤالك من خلال طبيب متخصص باطنى مثلا فى هذا الامور سوف ينصحك بتناول الاكل المناسب والامتناع عن اكلات اخرى، لكنى بعد الاعتناء باسنانى من خلال ذهابى للطبيب اصبح الموضوع احسن بنسبة 90% والحمدلله
    ربنا يوفقك واحمد ربك انك حاسس بنفسك فغيرنا كتير لا يحسوا ولا يهتموا بمثل هذه الامور الهامة وعلى رأسهم الجنس الناعم وهذا عيب وجرم اكبر وربنا يشفى كل مريض ان شاءالله.

اترك رداً أو حلاً لهذه المشكلة