السلام عليكم ..انا بنت في الصف الثالث الثانوى واعيش في قريه في الدقهليه ..عندي مشكلة كبيره ولكني مظلومة فيها..كنت معروفه دايما في الدفعه بتاعي اني كويسه وعلى خلق وكان دايما ولاد في سني يحولوا يكلموني علي الفيس بوك وكنت أرفض واصدهم. وكانوا مضايقني مني وبيقولوا عليا مغرورة عشان مش برضي اكلمهم ويقولوا اكيد هي بتكلم حد تاني ..لكني والله ماكلمت حد ابدا وكنت في حالي بكلم اصحابي البنات بس .وبعدين كلمتني واحده مرة وبقينا أصحاب اوي علي الفيس كانت كويسه ومرحه كنت بحب اتكلم معاها دايما وحبتها زي اختي وهي كانت أصغر مني بكم سنه وكانت من قريتي بس مش كنت عرفاها فطلبت اقبلها اشوفها وفعلا حددنا ميعاد واتقبلنا في الشارع وطلعت أخت واحد زميلي ويعرف وهو كان كويس وفي حاله برضه انا اما عرفت أنها اخته أترددت وقلت بلاش اكلمها بس كنت بحب اكلمها الصراحه لأنها كانت دمها خفيف وجه العيد وطلبت مني اني اروح أزورها في البيت وقبلت ورحت فعلا واتعرفت ع والدتها ووالدها وكده وفضلت قاعده شويه معاهم لحد ما جه أصحاب الولد زميلنا اللي هما زميلنا برضه وأول ماشفوني قعدوا يضحكون وحسيت منهم حاجه غريبه من نظرتهم ورحت وخلاص بعد الحكايه دي بكام يوم سمعت أن الولاد دول بيقولوا عليا أن بحب الولد أخو البنت دي وبروح له الدار وصحبته وقالوا كلام قذر وزي مايكون وا اتصلبوا انهم لاقولي غلطه وفرحوا ونشروا الكلام فى كل حته وانا عرفت وتعبت وفضلت أعيط وبطلت اذاكر مع العلم أن مستوايا كويس جدا وجاتلي حاله وتعبت واحنا ايام امتحانات ثانويه عامه والكلام ده مؤثر ع مذاكرتي وتركيزي ودايما بعيط وانا والله مظلومة من الكلام ده كله ومليش علاقه بالولد ده حاسه أن كده خلاص سمعتي تدهورت من ناحيه وكمان مستقبلي الدراسي اتدهور … يعني ده كله يحصلي عشان زرت واحده ! ياريت حد يساعدني ويقولي اعمل ايه في المشكله دي…شكرا
المشكلة فيكي وفي دماغك ليه تفكيرك راح ناحيه الناس بيقولوا والناس بتتكلم عليا…كل ده ما لوش أي أساس أصلا إنتي اللي محبكاها اوي ومتابعة اخبار الناس ونظراتهم…حطي في دماغك كويس جدا إن الناس ما بتسبش لا الحلو ولا الوحش.. وانتي ما عملتيش الغلط بالعكس إنتي بنت محترمه جدا.. أقولك تتعبي امتي لما تكوني فعلا بتكلمي شاب وفجأة الناس تعرف في الحالة دي تتصدمي وتوصلي لحاله نفسيه سيئة.لكن إنتي اتصرفتي بطبيعتك وموضوع حاسه إن الناس بتقول واحساسي من جوايا هيدمرني.كل ده مش صحيح احساسك غلط..عيشي بطبيعتك وشيلي من دماغك أي وساوس انتي بنت مؤدبه عشان كده حساسة جدا..ما تقلقيش وخليكي واثقة من نفسك واللي عملتيه مش غلط وربنا يوفقك للصالح دائما.
السلام عليكم يابنتي الغالية طالما انك واثقة من روحك ومتاكدة انك ماعملتيش حاجة غلط فلا تهتم ابدا لكلام هولاء العيال الفاسقين اللي طلعوا عنك الاشاعة القذرة دي واهتم بدروسك ومدرستك وابعدي عن رفقاء السوء تماما واقطع علاقتك بالبنت دي اخت الولد زميلك دا نهايا واوعي تتكلم معاها او تروحي تزوريها في البيت وربنا يسترعليك ويبارك فيك ويكفيك شر ولاد الحرام ويحميك من شرورهم