مشكلتى باختصار انى حاسه ان اهلى متحكمين فيا وفي اختياراتى زياده عن اللزوم
في البدايه انا ارتبطت بشخص من حوالى 3 سنين ولما اتقدم لاهلى موافقوش عليه انا كنت ساذجة وعرفت ان نظرتهم ليه كانت صح وانه مش عايز يتحمل مسئوليه
بعدها بفترة بدأت احس باهتمام من واحد قريبى واهلى بيحبوه جدا وهو كمان بيحبهم
وتقريبا قالى انه عايز يتكلم مع اهلى في انه ييجى يخطبنى
وفي مرة مامتى كانت عند والدته في البيت في زيارة ومامته لمحت على الحكايه دى
مامتى ساعتها مردتش بس لما رجعت سألتنى لو فيه اى ارتباط بينى وبينه قلتلها عادى بس انا حاسة انه بيهتم بيا
قالتلى ان هى عايزانى اتجوز من برة العيله واعترفتلى ان الشاب كويس لكنى هتعب لما اعيش مع مامته
قريبي ده انا حاسه انى بدأت اتعلق بيه وهو كمان اتعلق بيا
ومش قادرة اقوله انه ممكن يترفض لانى مش عايزة اخسرة كصديق لانه فعلا يعتبر اقرب صديق ليا واكتر واحد وقف معايا في كذا محنه عديت بيها
انا دلوقتى مش عارفه اعمل ايه موش عايزاه يتعلق بيا وفي نفس الوقت مش عايزة ابعد عنه
لأنى حسيت انه بيحبنى بجد وانا كمان بدأت احبه
خايفه جدا من رد فعل اهلى ومامتى بالذات لانهم عايزين ليا عريس تفصيل بمواصفات خاصة جدا
ومش عارفه اعمل ايه
هل فعلا احاول باى شكل انى ابعد عنه وافضل معاه كأصدقاء وبس
ولا اسيب الموضوع بظروفه ولما يبقي يتكلم مع اهلى يبقي فيه كلام تانى
مشكلتى دلوقتى انى مش عارفه مامتى معترضة على ايه بالظبط
وهل هيا بتعمل كده كل ما تحس ان فيه حد هييجى ياخدنى منها
زى اى ام في الدنيا خايفه على بنتها وتتمنالها انها تكون سعيده
بس بردو انا رأيي فين كأنهم بياخدوة مجرد تحصيل حاصل
نفسي احس انى اخترت مرة واحده
ومش معنى انى اخترت اول واحد غلط ان على طول اختياراتى غلط
لان اختيارى التانى هما عارفينه وعارفين اخلاقة وكل حاجه عنه من يوم ما اتولد
بجد انا محتارة وخايفه جدا انى افقده كصديق بسبب انى اخترته كحبيب
محتاجى ارائكو لو سمحتو
بصي بقى
طالما مفيش حد في حياتك ومعندكيش اعتراض شخصي على الشاب ده يبقى اتوكلي على الله ووافقي عليه وهو يتصرف مع أهله وأهلك
وكمان لازم تقفي جنبه وتضغطي على أهلك لغاية ما يوافقوا لأن ده حقك ومحدش له حق يتدخل في اختيارك لو اخترتي غلط مليون مرة.