مشاكل الزواج

بعشقها وعاوز اتقدملها بس حبيبتي انخطبت

انا شاب عندى 22 سنة بدرس اخر سنة بس بشتغل واقدر افتح بيت الحمد لله مرتاح جدا جدا بحب حبيبتى جدا جدا فوق الوصف فضلنا سنتين بنحب بعض قبل شغلى وهى بتحبنى جدا وانا كمان ولما جة وقت انى اتقدملها والدتى راحت معايا بس لخبطت الموضوع لأنها مكنتش بتحبها علشان كنت بتكلم كتير معاها جدا وحست انها اخدتنى منها لأن والدى متوفى من وانا عندى سنتين ووالدتى هى اللى ربتنى الحمد لله …. وحصل مشاكل بعد كدة طبعا حبيبتى قالتلى ان كدة ملناش نصيب وكدة مش هينفع نكمل وفضلت متمسك لغاية ما هى فضلت مصممة لغاية ما حسيت ان كرامتى بدأت فى الانهيار وارجوكم محدش يقول ان مفيش حاجة اسمها كرامة فى الحب ابدا لأن الكرامة فى كل شئ فى الدنيا وقولتلها ماشى وسيبنا بعض وبعدنا عن بعض سنة لغاية ما الوضع اتغير واتحسن الحمد لله وطبعا منستهاش ولا لحظة وديما بفكر انى هتقدملها فى اقرب وقت لما جت اللحظة عرفت ان حبيبتي انخطبت مع انة كان المفروض انها تستنانى بس محصلش لأنها انسانة عجولة كتير وبتحب الاستقرار بسرعة مع انها 19 سنة … وانا مش متخيل حياتى من غيرها ومش عارف اعمل اية اتكلم مع بباها او مامتها او اى حد ولا اعمل اية معنديش استعداد اعيش ولا يوم من غيرها … عشت قبل كدة سنة من غيرها اة بس على أمل انى هتقدملها تانى طبعا … دخلى دلوقتى الحمد لله كويس جدا جدا بيتراوح بين 5 الاف جنية الى 10 الاف جنية فى الشهر كبداية ان شاء الله مع ان دة كان وجة الاعتراض من والدها انى مبشتغلش … قولولى ارجوكم اعمل اية وبسرعة لأن الموضوع مش مستحمل ومحتاج سرعة وشكرا ليكم كلكم

مشاكل وحلول ذات صلة

اضيف بتاريخ: Monday, February 6th, 2012 في 07:57

كلمات مشاكل وحلول: , , ,

17 رد to “بعشقها وعاوز اتقدملها بس حبيبتي انخطبت”

  1. محمد
    03/05/2022 at 22:49

    انا محمد في مشكله وعاوز حل او مساعده ممكن انا بحب وحده بقالنا ٣سنين في السنه التالته دي اهلها عوزين يخطبولها وانا لسه مش كونت نفسي او لسه مش مستعد وانا بحبها اوي وهيا بتحبني اوي وبسبب الموضوع ده هيا انتحرت كتير وانا كمان مرتين ومش عارفين ليه الحل ممكن الحل بعد اذنكو واهلها عوزين يخطبولها بي الغصب

  2. محمد كرم الهراري
    25/02/2019 at 15:44

    السَلٱمٌ عـَلـْيگمّ-ۈرحـْمّـٌة ٱللـّہ ﯙبُرگـّاتہ اخي الفاضل قصتك جميله وفيها روح وسعي فيها جميل ولاكن اي شخص ينظر للمديه يبقي شخص تافه ولاكن اللي ينظر لشخص في ادبه واخلاقه واصالته هو ده الشخص اللي معدنه كويس جدا ويحترم وثانيا البُـنًتٍ اللي تقبل علي نفسها انها تقبل انها تتخطب يبقي دي مش في نيتها شئ،كويس،حتي لْـۆ ناويه انها تقبل شخص غيرك علشان تسيبه وترجعلك ده شئ،غير مقبول لشخصيه انها تعيش معاك لانه اللي بيحب حد بجد لآزٍمٍ يتحدي اي ظروف ولو ابوها رافضك يبقي اكيد مش هتقبل بنت تتحدي ابوها او امها او اخيها علشان اللي بيحب بجد يتمني الراحه لحبيبته انا قصتي لْـۆ عرفتها هيصعب عليك حالي فاارجوك التخطي من هذه العقبه التي تعيق مستقبلك وتجعلك قليل امام المجتمع ولا تذكر الكرامه ولا غيرها اذكر حاجه واحده بس كل شئ نصيب ولو الدنيا كلها جات عليك وعليها لْـۆ في نصيب هتخدها

  3. الدكتور
    14/07/2015 at 14:30

    جمال 18سنه وانا امبارح حبيبتى اتخطبت والمشكله انه انا مقحرش اتقدم عشان الثانويه لانى ف علم علوم وانا وهى بنحب بعص مت سنه خامسه ابتدائى وهى ما وفقتش لكن ابوها اجبرها وانا مش عارف اعمل ايه لانى بجد تعبان دى8سنين حب بالله حد يقلى اعمل ايه؟

  4. tota
    03/08/2012 at 06:20

    على فكرة ممكن يكون الموضوع داخل فيه اهلها لآن انا كنت بحب واحد جداا بس أهلى هما اللى غصبونى ان انا ابعد عنه انا دلوقتى بقالى سنه كامله بعيده عنه بس واللهى عمرى ما نسيته و صدقنى هى لو بتحبك هاتحاول تسيب خاطبها لآن انا حصلى كده والحمد لله سبت خطيبى و بتمنى حبيبى يرجعلى تانى ربنا يوفقك يا رب

  5. nona
    14/04/2012 at 19:43

    انت مش فى زيك اتنين
    انا بقول مش فى حب بجد بس طلع فى
    يااااااااااااارب تجوزها يا رب
    و هقولك على حاجة اللى بيحب بيحارب و يضحى
    مهما كانت النتيجة .. حاول بكل الطرق
    بس هى بتجبك لحد دلوقتى O.O ؟
    ازاى و قبلت حد تانى ؟
    امممم موضوع عاوز تفكير .

  6. Mohamed ammar
    20/03/2012 at 12:50

    انا حصلت معايا نفس المشكله بس فيها شوية اختلافات عن مشكلتك وانا هاعرض مشكلتي عليك بالتفصيل عشان تعرف ان اللي يشوف بلاوي الناس تهون عليه بلوته – اولا انا عندي 20 سنه – وظيفتي مشرف عمال – كان من المعروف عني في اثناء عمل تجنب التعامل مع البنات خارج حدود العمل – وكان السبب او الدافع اللي خلاني اعمل كده هو اني خايف ادخل في موضوع زي ده (الحب ) ممكن يبهدلي حياتي بالنشغال والتفكير فيه خصوصا ان بجانب شغلي الدراسه يعني انا رافض الفكره دي كمبدأ لحد ما اخلص دراسه وبعدين كل شيئ سهل .
    كنت ملاحظ ان واحده من البنات دول مبتتكلمش مع حد خالص اثناء العمل ودا اللي خلاني اعجب بشخصيتهاالمهم تجاهلت الموضوع ده لفتره .
    ووصلبي الحال اني لقيت نظراتها ليا بتزيد الموضوع تطور لغاية ما هي جت و كلمتني في موضوع عادي جدا .. وبا ما بينا ما يسمي بالصداقه الاخويه ( الكلام ده اللي املاه علي شيطاني ونفسي الاماره بالسوء)
    اقيت نفسي بقولها وبدون سابق انذار اني بحبها وعلي استعداد كامل اني اتقدملها بس يكون بعد ماخلص السنتين الباقيين من الكليه لقيت منها القبول وبالذات بعد ما هي اعترفت بحبها برده واستمر الحال علي هذا الوضع واكتشفت انها كانت في تجربه مع واحد قبلي وانفصلت عنه و لما كلمتها عن الموضوع ده قالتلي انه كان عايز يخطبها وهي رفضته لمجرد انها اكتشفت انه واحد عايز يتسلي وانا بصراحه اقتنعت بكلامها لاني عمري تخيلت انها ممكن تكدب عليه في يوم من الايام وبعد فتره جاني احد زملائي اللي ما يعرفش حاجه عن الموضوع يقولي انها اتخطبت لنفس الشخص المذكور سابقا ولما حاولت اتاكد اول ما شافتني جرت مني فعرفت انها كانت بتلعب و تتسلي ليس الا .. الموضوع ده اثر فيها جدا لدرجة اني ما كنتش عارف اتكلم مع حد من شدة الحزن
    مش الحزن انها ضاعت مني ولكن الحزن علي نفسي واني اتنازلت عن احد مبادئي عشان واحده متستاهلش وبعدين حسبتها مع نفسي تاني وبقي بالنسب ليه تجربه وع واحده ما تستهلش واني عطيتها اكبر من حجمها وبدات اقول نفسي هي لو بتحبك مش هاتسيبك حتي لو اتحدت الدنيا عشانك وبدات بتقبل الامر واكتشفت اني علي خطا لما عرفت انها كانت علي علاقه مع غيري وانا اللي مسبتهاش لان اللي ترك غيرك عشانك هايسيبك عشان غيرك .. ايه رايك في الكلام ده وهل في موقف زي ده يبقي الانسان عنده كرامه لو فكر في الرجوع تاني لواحده اتخلت عنه .. وصدقني ما تحولش ترجع لهاتاني لانها اتخلت عنك عشان غيرك او لمجرد سبب تافه انها عايزه تتجوز بس .. وحتي لو انت رجعت ليها ازاي هاتقبل تعيش معاها وانت عارف انها كانت عايزه غيرك لمجرد ان ابوهارفضك ماديا

  7. lovely rose
    16/03/2012 at 03:56

    ف البدايه بس احب اقول لاحمد ان الارزاق على الله وممكن يكون هو مش بيشتغل شغله حكوميه ممكن يكون مثلا ميكانيكى وبيكسب وربنا يزيده ويرزقه ويرزقنا جميعا لانه بيقول يتـــــــــراوح معنى كده انه مش مرتب ثابت اما بالنسبه لصاحب المشكله انا بأيد رأى sara عندها حق حاول تتكلم مع مامتك والحل ف ايديها انها تكلم اهل حبيبتك وتصلح اللى اتكسر وربنا يوفقك ويقدملك اللى فيه الخير.

  8. دودى
    02/03/2012 at 21:46

    انا شايفه ان لو كانت بتحبك قد ما بتحبها كانت استنيتك

  9. Tota
    22/02/2012 at 05:57

    انت اتكلمت عن حبك ليها طول الوقت لكن فين حبها هى ليك لو فعلا بتحبك هتتحملك ولو لفترة وهتتحمل ظروفك اللى انا شيفاها مش صعبه اوى
    انت بتقول انها اتخطبت يعنى خلاص مينفعش تفكر فيها تانى محدش بيموت علشان هتقدر تعيش وهتقابل بنات تانية وهتحب تانى
    وممكن يكون فقدانك لوالدك جعل احتياجك للحب اقوى حاول تتحكم فى عواطفك اكتر

  10. خوخة
    20/02/2012 at 21:55

    هي ديلوقت مش ممكن تسيب خطيبها و ترجعلك اولا لانك وافقت انك تبعد عنها سنة كاملة و تانيا بسسب امك لانهم غير متفقين و دا بجد حاته مشكلة كبيرة لانه لانفترض انه امام الجميع كانو كويسن و كدل بس النفوس مش حا تصفى ما بينهم… مهما حاولت زوجت الابن تعمل اكيد حا يكون في مشاكل في المستقبل.. توكل على ربنا يمكن مش هي نصيبك اللي مكتوبك و اكيد ربنا حا يعوضك بزوجة صالحة ترعاك تحافظ عليك و على بيتك. قالى تعالى و لسوف يعطيك ربك فترضى .. ضدق الله العظيم

  11. المهتدي بالله
    15/02/2012 at 14:43

    كن رجل ومن باعك بيعه
    انهن صنف نمرود ويكفرن العشير
    دوس على قلبك بالجزمه واياك اياك ان تشتري من باعك لانه من باعك مره يسهل عليه ان يبيعك مرات –يا أخي الدنيا مليانه ناس محترمه والبنات على قفا من يشيل
    وصدقني يا ابني ان عجلة الحياه لا تتوقف على احد
    حاول ان تبحث عن أخري تستحق قلبك ومشاعرك وتستحق ان تحمل اسمك
    واقول لك كلمه أخيره يعني اللي خلقها لم يخلق غيرها لا والله قد خلق غيرها ملايين وافضل منها واحسن وأجمل -عليك ان تخرج نفسك من هذا الوهم الذي تعيشه وابدأ من جديد
    وكن رجلا لأن الانسان بدون كرامه ليس له قيمه في الحياه -أترضى أن تبيع نفسك وكرامتك من أجل امرأه أعتقد انه لا توجد امرأه على وجه البسيطه تستحق ان يخسر الانسان كرامته من اجلها
    يا بني كرامتك فوق كل اعتبار

  12. اسمع ياسيدي
    08/02/2012 at 11:36

    اتصل بيها وقلها على هداوة باللي فقلبك من غيرها وانت لو بتحبها قوي كدة حارب الدنيا عشانها متنساش ان الموضوع دة هو الموضوع الوحيد اللي مينفعش تتردد فيه روح دلوقتي واخطبها بالعافية بقى بالذوق دي هتبقى ام عيالك فيوم من الايام واعمل اللي عليك وزيادة جت يبقى ميت فل مجاتش ملكش فالطيب نصيب بس زي ماقلتلك حارب الدنيا وحاول انك تقنع امك وقلها اي كلام ريحها وقدم امك عليها دايما وحتى لو امك هتغيظك بتصرفات بتحصل مع اي واحد فينا .. اتوكل على الله واجعل الله هو منجدك فالموضوع دة وان شاء الله يجيلك الخير

  13. magy
    08/02/2012 at 02:45

    والله انا راي ان هيا عاشت حياتها ومش معقول حتروح تكلم حد من اهلها وحيوافق انها تسب خاطبها وترجعلك وممكن تمون نسيتك في السنة دي ومتنساش ان هي قررت انها تبعد ومتنساش كرمتك فوق كل شئ لوربنا يوفقك بالي احسن منها ع فكرة طلما اتخطبت وغيرك دخل قلبها ووفقت علية يبقة ملكش مكان في قلبها مهو مش معقوا اهلها حيغصبة عليها تتخطب لوحد مش عايزاة ومحدش عارف نصيبوا فين يمكن يكون في نصيب ما بنكم

  14. امـــــــــجـــــــد
    07/02/2012 at 13:32

    نصيحه منى انسا ها وفكر وحب غيرها انا قسما بالله حصل معايا نفس الموقف بس على العكس ان محدش بوظ الموضوع غير الانسانه دى وهى لو فعلا بتحبك هتعمل المستحيل علشانك ومكنتش قالتلك لا احنا ملناش نصيب فى بعض لازم تكون عارفه ان اللى بيحب بيسامح وتحاول تهدى الموضوع مع اهلها لان اهلها لو حسوا بس كدا انها عاوزاك هم بنفسهم اللى هيجولك
    وفى مثل قديم بيقول قبل ما ….. البنت فى …. ن….. فى ودنها
    كش كدا ولا ايه ؟؟؟

  15. مدمنة السهر
    07/02/2012 at 01:00

    البنت يخطبوها 10 ويتزوجها واحد والزواج قسمة ونصيب الظاهر والدتك زودتها معهم والبنت هلا مافيها تسوي شي الله يعينك

  16. sara
    06/02/2012 at 19:21

    الغلط كان من مامتك وزي ما كان الغلط من مامتك يبقى لازم الحل يكون منها بس باردو لازم تتكلم مع مامتك بكل ادب واحترام علشان مهما كان ده مامتك وتخليها هيه اللي تكلم اهلها

  17. احمد
    06/02/2012 at 16:42

    هو حضرتك بتشتغل ايه لما دخلك مابين 5 الى 10 الاف -فين الثوره و العداله الاجتماعيه
    اللهم ارزقنا رزقا طيبا و بارك لنا فيه
    المهم الاحترام و الموده مو الرحمه والقبول
    الحب ليس هو الاساس الوحيد للزواج
    ربنا يكرمك بغيرها
    اللى ينساك انساه و كبر دماغك

اترك رداً أو حلاً لهذه المشكلة