انا عندى 20 سنه انا كنت بحب واحد من 8 سنين وكان الحب الاول ده متبادل الحكايه بدات انه كان بيحبنى وانا ماكنتش عارفه بس انا كنت معجبة بيه مش اكتر لكن بعدها بسنه لما عرفت انه بيحبنى انا بدات احبه بس من غير ماخليه يااخد باله لحد ماهو كمان عرف او حس انى بحبه هو ماكانش فى البلد اللى انا عايشه فيها كان من بلد تانيه بس هو قريبى وكان بييجى فى المناسبات بس بس ماعرفش ليه انا اتعلقت بيه وحبيته مع ان انا عمرى ماحبيت اصحابى اللى بيعملوا كده وكنت فى الاول بدايق انا ازاى اعمل كده من ورا اهلى لدرجه انى ماكنتش بكلمه فى التليفون علشان ده غلط وهو كمان ماكنش بيحاول يعمل ده ولما كنت بشوفه كنت ببعد عنه علشان ماحدش يعرف حاجه من اهلى مع ان الناس كلها كانت عارفه اننا بنحب بعض لان احنا الوحيدين اللى كانت علاقتنا محدوده مع بعض شويه ماكانش بيعاملنى زى اى حد عادى كده وبعدين شويه شويه بقى ييجى عندنا كتير وهو عمره ماعمل كده لحد ماتعلقت بيه اكتر وهو حاول يبقى حاجه كويسه علشانى علشان لما ييجى يتقدملى مايترفضش دخل كلية الهندسة وانا كنت لسه فى الثانوية العامة وفى يوم لقيته قال لمامتى انه بيحبنى وانه عاوز يتقدملى بس مش دلوقتى انا لما عرفت انه قالها استغربت وسالته قالى علشان مانعملش حاجه غلط ونبقى فى النور وفرحت من تصرفه ده جداااااااااا مع ان هو ماقاليش كلمه بحبك الا من سنتين او تلاته بس تقريبا عمرها ماقالها لى قبل كده حتى كنا مش بنسلم على بعض علشان ده حرام وعلشان ربنا يوفقنا ويكرمنا فى الموضوع ده وعدت سنه ورا سنه لحد مانا دخلت الكلية واول سنه فى الكلية بتاعتى بدات الخناقات بينا تكتر بس مش دايما وبعد كده فى تانيه كلية انا وهو بعدنا عن بعض واحنا مع بعض زى ماهو بيقول انى ماكنتش حاسه بيه مع انه مش عارف ان كل دقيقه فى عمرى مابتعديش غير لما بفكر فيه وفى اخر تانيه بدات ادخل شات ماعرفش ليه انا عملت كده بس كنت كل مره بعمل كده كنت بدايق من نفسى واقعد اعيط انى مخبيه عليه بس ماكنتش بعرف امنع نفسى انى مادخلش شات بس انا ماكنتش بكلم ولاد بس وماكنتش بكلم حد واحد بس لوحده انا كنت بكلم مع ناس كتير فى الروم المهم اكتشفت انه كمان بيدخل شات صدفه مش هو اللى قالى كانت تصرفاته غريبه معايا وكمان كلامه فسالته ….. ضحك وقالى نتكلم بعدين فى الموضوع ده ولما اتكلمنا وقالى عليه انا بكلم كذاااا وكذااااااا انا مش هكذب انا زعلت فعلا وقلت علشان كده انا كمان كنت بعمل كده بس هو قالى ان انا اللى دخلت شات الاول علشان كده هو كمان عمل كده من غير ماحد فينا يعرف ان التانى بيدخل المهم يومين وبعد كده سامحته علشان بحبه وماضغطش عليه انه يبعد عن البنات دى كمان قلتله بكل زوق لو انت بتحبنى مش هتكلمهم وكمان قلت كده لنفسى وبالفعل مش بقيت افتح الايميل ولا بقيت ادخل شات تااااااااااانى لحد ماقالى خلاص مش هدخل تانى بس مش هقطع مع الناس اللى انا بكلمهم دول مره واحده اصلهم ناس محترمه اوى سكت وماتكلمتش مع انى بتحرق من جوه انه مش وافق بسرعه ياانا ياهما بعد كده المشكله الكبيره انه عرف انى كنت بكلم ناس وبدخل على شات وكذبت عليه انه مش بتاعى علشان انا عارفه انه مش هيسامحنى زى مانا عملت صدقنى وهو مش مصدقنى جواه بعدها بفتره قلتله بقى ياانا يا البنات دى اللى انت بتكلمهم زعل منى وقفلنا على كده بعدها بيومين انا اللى اتصلت بيه علشان اقوله انا اسفه انى كنت قاسيه عليك فى الكلام ومعلش حقك عليا وانا هفضل معاك لحد ماتسيبهم واحده واحده ….. زى مانت قلت لقيته فاجانى …….وقالى انا عاوز اقولك على حاجه هتزعلك فبقوله فى ايه قالى انا عرفت ان الايميل كان بتاعك وانتى ليه كذبتى وفضل يزعق ماعرفتش ارد عليه من خوفى ساعتها فضلت اسبوعين ماتصلتش بيه لحد مافى يوم كلمته قالى خلاص انا مابقتش احبك تانى بس انا عارفه ان ده من ورا قلبه علشان اللى انا عملته وانا عارفه انه مش بيحب الكذب بس علشان احافظ عليه كذبت المهم قفلت معاه واحنا خلاص انفصلنا عن بعض وانا اقنعت نفسى ان دى فتره وهتعدى وهيرجعلى فجااااااااااااه لقيته جه وقال لماما كل شئ قسمه ونصيب الكلام ده كان صدمه ليا منه وتعبت اكتر من الاول نفسيا وجسديا وماكنتش بتحرك من مكانى من ساعة ماسابنى ولا كنت بروح الكليه ولا كنت بخرج من البيت وانا عارفه انه هو كمان تعبان وعرفت انه مش بيرح الكلية ومش بيروح الامتحانات كمان ولحد دلوقتى بيسال عليا وماعرفش هو ليه عاوز يتعب نفسه ويتعبنى معاه مع انى اتاسفتله مرتين بسبب الموضوع ده وقالى خلاص انتى ضيعتينى من ايدك واصحابى قالولى خلاص طالما هو سابك يبقى مابيحبكيش ومايستاهلكيش اساسا ومامتى برده قالتلى نفس الكلام وكمان سبب فى المشاكل اللى كانت بينا ان مامته مش مواقفه عليا علشان احنا قرايب وكده وكمان علشان ماتزعلش اختها اللى هى عاوزاه لبنتها وهى مش عاوزه تزعل لا مامتى ولا اختها وهو سابنى بسبب كده برده علشان مامته مع انى كنت هستحمل اى حاجه من امى وابويا علشانه لحد مااخده بس الحمد لله انا راضيه باللى انا كنت فيه وكمان هو اتغير بطريقه وحشه اوى مابقاش الانسان اللى انا حبيته زمان حتى الناس كلها اخدت بالها وقالتله بس هو خلاص بقى يعمل اللى فى دماغه وبس سواء صح او غلط انا لحد دلوقتى بقالنا 3 شهور سايبين بعض ومش قادره انساه بحاول انسى نفسى مش عارفه حتى على طول بيطلعى فى الحلم عاوزه حل لمشكلتى دى لانى مش عارفه اذاكر وخلاص الامتحانات على الابواب وربنا يصبرنى ……
الحب الاول
ضيعت الحب الاول بكدبة ومش قادرة انسى
اضيف بتاريخ: Tuesday, December 28th, 2010 في 10:07
كلمات مشاكل وحلول: الامتحانات, الايميل, البنات, التليفون, الثانوية العامة, الحب الاول, الحب الاول, الحلم, الكلية, شات, كلية الهندسة, مشاكل الحب, معجبة
كل اللي عملتي غلط ومابني على غلط فمصيره في النهاية الفشل انصحك بنسيانه للابد وقطع الاتصال به فورا لاجل كرامتك وكرامةاهلك وتاكدي ان الله بيكرمك ويعوضك بخير منه يكون نعم الزوج اللي يستاهلك ويسعدك في حياتك
أنا شايف إنه لا يصلح لك
فلا تفكري فيه مرة أخرى
فمن باعك لا يستحق التضحية
بل لا يستحق التذكر أصلا
ولا تقللي من كرامتك وعزتك..
بصراحه وممكن كتير يختلفوا معايه
اى بنت تدخل شات تبقى مش محترمه
ولا تستحق تكون زوجه
اتقى الله فى نفسك
وخليكى كالتفاحه على الشجره
وليس على الارض
والله 99% منالشباب والله بيتسلوا مش اكتر
قربى من ربنا
وبالتوفيق
على فكرة دى كمان كتير تشبه حكايتى المشكلة كلها انك حبتيه وانت فى سن صغير وكبر الحب معاكى وطول الفترة خلت تقريبا كل ذكرياتك مرتبطة بيه وعشان كده نسيانه صعب جدا انا بقالى 9سنين قاطعة العلاقة ولسة ما نسيتهوش لكن لو اقولك انى على اد ما حبيته كرهته لانه كان عامل ذى الاخ اللى عندك ما اتمسكش بيه ادام ابوه ذى ما عملت ادام اهلى بالرغم من ان البنت اقل حيلة من الولد لكن للاسف ما عملش كده غير بعد ما اتخطبت ولانه اتخلى عنى سبته وانا قلبى بيتقطع ولحد الان هو ندمان عليه بعد ما اصبح لكل واحد فينا حياة وبيت واطفال كماناما انا بلعن اليوم اللى عرفتوا فيه خلاه ضيع احلى سنينة عمرىومش ندمانة ابدا انى سبته لكن ندمانه فعلا انى عرفته مع انى لا اندم غالبا على شىءسبيه ولو بيحبك هيرجعلك وانت كمان تتشرطى عليه لو اردت شيئا فاتركه فان عاد اليك فهو ملكك وان لم يعود فلم يكن لك من البداية
يا بنتي والله العظيم انا لما كنت بقرا حكايتك انا كنت بحسب ان حد عارف حكايتي وكاتبها انا كنت زيك بالظظظظظبط ف كل حاجه انتي قولتيها حكايتك دي حكايتي انا كمان وانا عندي 20 سنه على فكره برضه بس انا فكيت من سنه والحمدلله انا دلواتي زي الفل وارتبطت بواحد تاني معيشني ملكه في الحياه كلها وعارف قيمتي كويس جدا انسيه واهتمي بمزكرتك ودراستك اهم دا واحد كان بيلعب وبيتسلى وبس انسيييييه
انسيه خلاص عشان دا كان بيتسلى ولمه زهق سابك ولعلمك انتي هتتعبي كام شهر مش هقولك ايام لان انا مجربه وكنت بموت اكتر منك مليون مره كنت بمشي في الشوارع اعيط من الجرح بس دلوقتي فوق وبقيت عادى بس هتاخدى فتره ولعلمك مش هتعرفي تنسي برضو لانك عشرتيه والعشره دى بالذات مش هتعرفي تنسيها وربنا معاكي حبيبتي
السلام عليكم
انت اول شيئ حبيتيه فس سن مبكر جدا انا ما بقول في المرهقة بل في الطفولة ودا مش حب ياحبيبتي دا كان اعجاب بنكم وبس لو في نصيب راح يرجع لك ولو ما في راح يرزقك الله ما احسن متو لكن انصحك انك لا تكلميه في الهاتف او تروحي لعندو عشان انت الي عملتيه معاه كفاية انت طلبتي منو السماح وخلاص تاني شيئ متفتكريش انو سابك عشان كدبتي عنو في موضوع الشات والامور دي لا ابدا لانو اد كان بيحبك كان سمحك كيف انتي بتسميح لكن هو ممكن يكون سابك عشان مامتو بدها تزوجو لابنت اختها واد امو ما حبتك في ما راح تحبك على طول
انا بنصحك انك تنسيه عليكي وتفكري في الدراسة والنجاح وانك تشيليه من تفكيرك وتعيشي حياتك ولو يحبك بجد راح يجي لك وان شالله يكون خير
اختى انا عايزة اقولك حاجة الانسان اللى بيحب عمره ما ينسى حبيبه وبيقدر يسامحه وياريت انتى تحاولى تتكلمى معاه وتقوليله ربنا بيسامح
انت ليه مش عايز تسامح وانت لو بتحبنى تقدر تعمل اى حاجة عشانى وياريت تفكرى فى نفسك لان مفيش حد هينفعك
اختى الفاضلة انا قريت رسالتك بكل دقه وإمعاء بس تسمحيلى وانا متأسف لان كلامى هايكون شديد شوية بس تأكدى كل الثقة اننا لا اريد الا ان اساعدك فى خروجك من هذه المحنة
اولا انا شخصيا لا اعرفك ولا حتى اعرفة علشان كده انا هاقول رايى بكل حياد
اولا من كلامك انك بدأتى تحبيه وانتى عندك 12 سنة يعنى كان تفكيرك ومشاعرك لم يكتملوا بعد وهذه المرحلة دائما بتحصل فيها مثل هذه الامور بالنسبة للبنات انا عارف انك مش هاتصدقينى لو قولتلك ان حبك دا مكنش حب حقيقي كان مجرد شعور جديد فى حياتك وممكن يكون اعجبتى بشخص اعطى لك المزيد من الاهتمام والحنان اللى كنتى بدورى عليه او مكنتيش حاسة بيه فى البيت او من اصدقائك علشان كدا بداتى تتعلقى بيه والدليل على كلامى بداية دخولك الجامعة بدأتى تتعرفى على شخصيات اخرى وصدقينى هو كمان نفس الموضوع معاه اعجب بيك وبعد كدا وجدك اجبتى بيه فبدء الموضوع يتطور الى ان تعرف هو الاخر على مجموعة بنات وبدء يلاقى فكر اخرى واندمج معاه
اختى الفاضلة انا من رأيى الذى لا قيمة له إطلاقا هو انك تركزى فى دراستك اولا وحياتك الشخصية ثانيا انا مش هاقولك هو لو مكنش بيحك مكنش سابك بس كل اللى انا هاقولهولك انه لو مهتم بيكي كان على الاقل خاف على مستقبلك وكان يهتم اكتر بيكي حرصا علي مستقبلك
فأتمنى بجد انك تنسى هذا الموضوع مش انك تحاولى لا تنسى إطلاقأ وصدقيني انتى لسه نصيبك الحقيقي مجاش وربنا وحده يعلم انتى نصيبك مع مين
اتمنى ان اكون استطعت ان اساعدك
وتقبلى تحياتى
اخوك
اختى الفاضلة هو كل الشات غلط ولا انتى عارفة انك كنتى بتعملى غلط التعراف شى جميل
بس لازم يكون فى حدود الاحترام وانتى لو كان علاقتك مع اصحاب الشات فيها الاحترام
ما كنتى كذبتى علية انتى غلاطنة وبعدين دة مش سبب انو يضيع كل الحب دة لو متاكدة انو بيحبك روحى قابلية واعتزرى لهو وعرفية على اصحاب الشات حتا يعرف انهم محترمين لو كان ذلك ولو ماقبل الاعتزار اتركية وابداى من جديد