السلام عليكم….انا شاب عمرى 23 سنه….مشكلتى فى انعدام الثقه بالنفس عندى…وده نتيجه لمواقف كتيره تعرضت لاكترها وانا صغير…وفى منها وانا مراهق ودلوقتى كمان…..المشكله انى انسان حساس جدا واى حاجه صغيره بعمل منها مصيبه….وده بيأثر على نفسيتى جدااا وبيضعف ثقتى بنفسى…..معنديش اى هدف فى الحياه ودايما بخرج من حالات فشل ورا التانيه حتى لو كانت حاجات سهله بردو بفشل فيها….وده مش لانى فاشل والله…ده لان الثقه بالنفس معدومه……انا عندى 23 سنه وشويه وده سن النضج والمستقبل…..مش عارف اعيش حياتى دلوقتى امال هعيشها امته؟؟ هحقق اللى انا عاوزه امته؟؟ وانا والله حاولت سنييييين انى اخرج من المشكله دى مش عارف………..نفسى اثق فى نفسى…..نفسى احقق اهداف مهما كانت صعوبتها…نفسى يبقى عندى اراده قويه….نفسى اطلع من حاله اليأس والكسل اللى انا فيها…..وشكرا ليكم
اقسم بالله كأنك بتتكلم عنى
اعزل نفسك في حاجة بتحبها وخلي النية من عزلتك ” انا هعزل نفسي عن الناس عشان أعرف عيوبها ” انا عارف انها عملية صعبة وسن العشرينات مع العزلة بتحس بعدم أمان مع البنات خاصة لكن لو تعرف كمان ان البنت زي الولد في مشاعر الخوف والعزلة هترتاح أوي انا مريت بتجربتك وعارف ان فيه مليون واحد زيي من وسايل التواصل كلهم عندهم مشاكل بنسبة متفاوتة وأكتر من مليون كمان ودة بسبب ان الجيل بتاعنا دة تم تنشئته على العزلة من الطفولة لغاية ما يخلص جامعة بعدها لما يحس ان المستقبل قدامه يتفاجئ انه بيتعور من جوه وبيعور الي حوالين منه وبيحس انه بعيد عن قيم الخير والجمال وانه بيسعى للمثالية بأكبر طاقة ممكنة فوق طاقته بكثير وجزئية انه يتحلى بالخير المحض لكن نفسيته مش هتتأقلم فيروح للشر ويصيب منها بعدها يعتقد ان التصرف أو الموقف كان شر محض ودة أكبر غلط بنقع فيه نتيجة المسلسلات والدراما الي بتصور لنا المفهوم دة فنسبية الخير والشر في المواقف والأشخاص بتخليك تعرف عيوب نفسك والناس برضو وتكون أكثر مسئولية وارتياح نفسي أما بعد مرحلة انك تعرف عيوب نفسك تعمل عزلة وقتية لكنها مستمرة “هاعزل نفسي عشان أطورها” اعزل نفسك في أي حاجة تحبها مع الاختلاط بالأهل والقرايب بالسؤال وضيف خفيف عليهم وبعد كدة انت تعيش في البيت ملك تعامل اخواتك بحب وتبادر مشاعرك لأمك وأبوك مانكرش ان فيه مشاكل عائلية بتحس فيها انك مقيد بمشاكل أبوك أو أمك لكن بداية التغيير الي هتلتمسه في عزلتك النافعة انك تعاملهم زي ما تحب تعامل نفسك تلتمس لهم العذر تخدمهم في الأكل والشرب ونظافة البيت ولو حابب تقعد على النت تكتشف أسرار الدنيا وتعرف نفسك أكثر وشكراً لجوجل الي ساعدني في دة يبقى تدي ساعة من وقتك لأفراد الأسرة الكريمة ودة الي انا عملته انشغلت بنفسي وبيتي لغاية ما حسيت ان العزلة الي انا فيها نافعة ومفيدة .
شوف ياااخي العزيز علشان تسترد ثقتك بنفسك لازم اولا- تتوكل على الله عزوجل وتبعد عنك الخوف والقلق عند مواجهة الاخرين والتكلم معهم ثانيا- تكون اجتماعي وتبعد عن الانطواء والعزلة والوحدة عن الناس وتشاركهم هموم الحياة ومشاكلها ثالثا- عاوزك تقرا كتب ومحاضرات الدكتور ابراهيم الفقي وكتب الدكتور طارق السويدان اللذين يتحثوا عن الاعتماد على الذات واستعادة الثقة بالنفس تلاقي الفائدة من المحاضرات والكتب اللي تتحدث عن هذا الموضوع وتستفيد منها طوال حياتك واتمنى لك الخير والتوفيق في حياتك