السلام عليكم .. انا أعاني من مشكلة شديدة وهي ان خطيبتي يتيمة الام والاب .. وتمت خطوبتها من قبل من شخص كانت بتحبه لكن خذلها وتم فسخ هذه الخطوبه .. ولما فسخت الخطوبه انا اتقدمتلها وهي عملت حجات كتير عشان تتأكد من حبي لها ولما اتأكدت ان انا طيب وحنين وبعرف ربنا بادلتني نفس الحب في البدايه لكن دلوقتي غير مهتمه وعصبيه اووي وعنيده فوق الخيال ، وكل مره انا بتعامل بحكمة وبمسك نفسي عشان هي دائما بتقول ان انا بعوضها عن حجات كتير وبرضو عشان وحيده وبخاف كلامي يكون جارح .. هي بتتعصب عليا دايما ومش متفاهمه معي والداهيه انها بعض الاوقات مش بتحترمني وتفضل تزعق فيا .. ساعات بحس انها عاوزاني ابعد .. اجي أبعد تقربني .. اقرب منها تفضل تتعصب عليا … بس بترجع تتأسف وتبأا حنينه ..
يا جدعان انا سبتها في مرة تلت ايام عشان غلطت فيا … صعبت عليا جدا حاسس انها مسئوله مني .. رجعتلها فهي عاتبني وبكت .. ووعدتها ان مش هزعلها تاني … بعد كام يوم اتعصبت عليا وبتبص لهدوئي معاها انه ضعف ، ع الرغم والله هدوءي وحناني عشان ما اكونش انا والظروف الصعبه … بعدين هي رجعت اتأسفت تاني وعاوزاني اكلمها .. انا كل لما اجي اخد معاها الاجراءات الطبيعيه بخاف اجرحها ..
انا بحبها وعاوز حل يخليني اكمل معاها من غير خوف .. لان انا خايف من عصبيتها وعندها .. وبتتعبني وبتأثر عليا وع دراستي ..
فلما بشوف حالتي المتدهوره بسبب عصبيتها وعندها ليا ببأا عاوز اسيبها بس خايف اكون بظلمها .. وخايف لو كملت تفضل تعباني ..
انا مش عارف انقل لحضراتكم صعوبة الحالة النفسيه اللي انا فيها دلوقتي .. فممكن ترشدوني للصواب ع قدر المستطاع
مشاكل الشباب قبل الزواج
خطيبتي يتيمة الام والاب عصبيه جدا وعنيدة
اضيف بتاريخ: Tuesday, November 14th, 2017 في 12:37
كلمات مشاكل وحلول: الحب, الخطوبة, الزواج, حب, زواج, شاب
حكايتك دي حصلت مع اخوي كان خاطب فتاة مش من اقاربنا لكن نعرف اهلها من زمن طويل والفتاة دي يتيمة الاب والام ماتوا في حادث سير وهي كانت صغيرة وعاشت البنت مع جدتها لامها وكانت البنت عصبية وعنيدة جدا المهم اخوي احبها وتعلق فيها ورغب في الزواج منها وتمت خطوبته لها بموافقة الاهل وكل الاهل قالوا له ان دي البنت عصبية وعنيدة وصعب التعامل معها لكنه اصر على الاستمرار معها حتى الزواج وكان يقول عايزها واستحالة اتزوج غيرها وحرام اظلمها بعدما تعلقت فيه وخصوصا انها يتمية الابوين وربنا يحاسبني ان تركتها وعندي احساس انها هتتغير للاحسن والحمدلله صارت البنت نعم الزوجة تغيرت تماما بعد الزواج ولافي عصبية ولا عناد وحياتهم الزوجية على خير مايرام وعايشين في قمة السعادة والهناء ولله الحمد على كل حال
اخي الفاضل بارك الله فيك والله انك ابن حلال كويس وتعرف ربناعزوجل اذا كنت فعلا تحب البنت دي وترى انها تستاهل حبك ومشاعرك فاستمر معاها وخصوصا انها يتيمية الابوين وتكسب فيها الاجر والثواب من عندربنا عزوجل استحمل عصبيتها وعنادها وماتزعلش منها وصدقني انها سوف تتغير للافضل طالما انك بتعاملها كويس ومتمسك فيها وربنا يؤفقكم ويسعدكم ويتمم لكم بالخير ويصلح لكم الاحوال وعقبال مانفرح بكم قريب ان شاءالله
مبدأيا انا شايف ان مشكلتك الاساسية انك بتخلط مبين تصرفاتها معاك وانها مش مريحاك وبين انها يتيمة الاب والام , شوف لازم تعرف ان فكرة انها يتيمة مخلية ظروفها صعبة دا شئ صحيح لكن مينفعش فى نفس الوقت انك تحمل نفسك مسؤولية هيا فى الاصل مش عليك .. ربنا سبحانه وتعالى قدر لها القدر دا مش انت اللى موتهم عشان تحس انك مينفعش تسبها , انا مش هقولك سيبها او افضل معاها لكن بقولك لازم لو قررت تفضل معاها يكون القرار دا نابع من رغبة فعلية للارتباط وان دى الانسانة اللى تقدر تتفاهم معاها وتفهمك ميكنش نابع من شفقة ..